Sch'i fiss vegnì votà ils 27 d'avrigl 2019, lura avessan votantas e votants acceptà omadus projects:
- La refurma fiscala e finanziaziun da l'AVS avessan els approvà cun in relativ cler Gea.
- Il midament da la lescha d'armas cun in cler Gea.
- La participaziun a las elecziuns fiss stada tar 45%.
Trend per in Gea per la refurma fiscala e finanziaziun AVS
Vers la fin d'avrigl avessan 59% dals Svizzers e da las Svizras mess segir u plitost in Gea en l'urna per la refurma fiscala e finanziaziun da l'AVS. 35% avessan ditg Na. En citads grondas ed aglomeraziuns è la tendenza vers in Gea in zichel pli aut cumpareglià cun regiuns ruralas. Sa verifitgada è la dependenza da gudogn: quels che gudognan damain vulan plitost dir Na, quels che gudognan dapli cleramain Gea.
Quatter arguments gidan da furmar l'opiniun e da dir Gea a quest project: la segirezza da la renta, l'attractivitad per interpresas sco era l'imposiziun eguala da taglia per interpresas internaziunalas ed interpresas pitschnas e mesaunas. Cnap persvada era l'argument che la la refurma fiscala e la finanziaziun da l’AVS è in project che schlia dus problems urgents en ina.
Ils arguments da la vart Na èn: la colliaziun nundemocratica da dus temas esters e la perdita da taglia. I na saja betg fair da metter en votaziun projects quasi identics a quels ch'il pievel ha gia ditg Na il 2017.
Cler Gea per midament da la lescha d'armas
L'intenziun da votar è clera: Dus terzs dals votants e da las votantas (65%) èn vinavant segir u plitost segir dal project. Bun in terz (34%) vul dir Na. Las cifras d'aderents e d'adversaris èn cunquai bunamain medemas sco tar la retschertga da la fin da mars.
L'opiniun tar quest project è gia vegnida furmada baud. Fitg cler èn era las frontas tranter las gruppas dals simpatisants da partidas: Ils simpatisants da la PPS èn plitost cunter il midament da la lescha – simpatisants da tut las ulteriuras partidas èn per il midament da la lescha.
La probabladad d'in Gea è vinavant fitg grond. Cunquai crescha era l'avantatg dals arguments PRO: In Na pericliteschia la cunvegna da Schengen/Dublin e las novas reglas n'hajan naginas consequenzas per tiradurs. Percunter èn pli pauc che 50% dals dumandads d'accord cun ils arguments CONTRA: Las novas reglas sajan cunter il princip da la Svizra e che quellas reglas sajan in emprim pass envers la fin da la libertad en Svizra.
L'institut gfs.berna ha fatg la retschertga per incumbensa da la SRG SSR.
RR novitads 06:00