Siglir tar il cuntegn

Header

cuntegn

Karin Keller-Sutter Cun forzas unidas cunter l'iniziativa da limitaziun da la PPS

La ministra da giustia Karin Keller-Sutter ha lantschà il glindesdi da nov la campagna da votaziun cunter l’iniziativa da limitaziun da la PPS. Gia l’entschatta favrer aveva Keller-Sutter preschentà la posiziun dal Cussegl federal. Pervi da la pandemia da corona è la votaziun dal matg dentant vegnida spustada ed uschia er il cumbat cunter l’iniziativa da limitaziun. Quella duai uss vegnir ils 27 da settember a l’urna. Ella pretenda che la cunvegna davart la libra circulaziun cun l’UE vegn negoziada da nov.

Arguments encunter n'èn betg sa midads

Vid ils arguments dals adversaris n'è sa midà nagut durant il temp da corona. Il Cussegl federal, ils sindicats, l'Uniun d'artisanadi e mastergn, las federaziuns dals patruns e Travail Suisse teman en spezial la fin da las relaziuns bilateralas cun l'Uniun europeica en cas che l'iniziativa da limitaziun vegniss approvada dal pievel e dals chantuns.

L'iniziativa metta en dumonda la via bilaterala. Ella pretenda che las cunvegnas bilateralas vegnian contractadas da nov cun l'UE entaifer in onn. Che quai po avair success, dubitan tant Keller-Sutter sco era ils auters adversaris da l'iniziativa.

Sche quellas contractivas faschessan naufragi, stuess la Svizra visar ils contracts. Pervi da la clausula da guillotina crudassan era tut ils auters contracts bilaterals I. La Svizra perdess tenor in studi plirs tschients milliardas francs tar l'economia. Er ils contracts da Schengen-Dublin fissan en privel. Quai inclusiv consequenzas per la segirezza, il sistem d'asil u il traffic da cunfin ed il turissem.

RTR novitads 11:00

Artitgels legids il pli savens

Scrollar a sanestra Scrollar a dretga