Il mitos dal nausch luf è naschì gia en il temp medieval: Ils purs avevan be pauc muvel ed avevan da cumbatter per surviver. Sch'in luf stgarpava lura anc in animal era quai ina catastrofa per ina famiglia e valeva savens sco chastì divin. En il 16avel e 17avel tschientaner datti adina dapli conflicts cun il luf, damai ch'ils purs tegnan adina dapli animals da nez.
En il 19avel tschientaner ha quest svilup manà a plirs conflicts: Il guaud era runcà per avair surfatscha cultivabla e la selvaschina era reducida massivamain pervia d'ina chatscha nunlimitada (il capricorn ed il tschierv eran ragischads ora en Svizra). Ils lufs che vegnivan uss pli datiers als vitgs vegnivan sajettads - per part perfin per survegnir ina premia. L'ultim luf en l'Engiadina è vegnì sajettà l'onn 1821, quai tenor las retschertgas da la fundaziun Kora, ch'observa e documentescha a lunga vista il svilup dal luf en Svizra.
Emprima lescha da chatscha
L'onn 1875 relascha la Confederaziun per l'emprima giada ina lescha che regla tge animals ch'ins dastga sajettar e nua ch'i dat territoris da protecziun, scriva l'Uffizi federal per ambient. Grazia a questa lescha datti dapi lura puspè tschiervs, chamutschs e capricorns en Svizra.
Il luf è turnà l'onn 1995 - l'emprim eran quai singuls, per exempel en il Vallais. L'onn 2012 datti l'emprim triep da lufs e quai en la regiun dal Calanda, datiers da Cuira. En l'entira Svizra vivan actualmain circa 80 lufs (stan: fin 2019).
Grischun cun adina dapli trieps
En il Grischun datti adina dapli lufs. L'onn 2019 ha l'Uffizi chantunal da chatscha dumbrà 711 observaziuns da lufs e 17 lufs giuvens èn naschids.
Actualmain vesi ora uschia en Grischun (stan 27.08.2020):
- 7 trieps
- 35-40 lufs
- 170 animals da niz stgarpads (90 da quels ord muntaneras protegidas)
Actualmain procuran ils lufs surtut en Surselva adina puspè per discussiuns. Ina schelta da lingias grassas dals ultims onns:
- mars 2016: Fraudulà in luf en Tumleastga
- avrigl 2016: Sajettà nagin luf al Calanda
- favrer 2017: Discussiun davart la convivenza cun il luf
- october 2018: Plirs lufs giuvens crodan a Trin
- avust 2019: Uras per sajettar il luf a Sursaissa?
- november 2019: Sajettà quatter lufs dal Beverin
- december 2019: Plirs accidents cun lufs sin via e rodaglias
- schaner 2020: Il fotograf Peter Dettling n'ha nagina tema
- zercladur 2020: Sistem d'infurmaziun davart il luf
- fanadur 2020: Filmà il luf sin l'alp d'Andiast
- fanadur 2020: Lufs dattan dapli lavur a l'Uffizi da chatscha
