Las annunzias pervi da rassissem s'augmentan vinavant en Svizra. L’onn passà hajan ils posts da cussegliaziun registrà 708 cas – uschè blers sco anc mai. Il 2021 haja dà 630 annunzias e l’onn avant 572. Quai rapporta il «SonntagsBlick» che sa referescha ad in rapport da la Cumissiun federala cunter il rassissem e da la plattafurma d'infurmaziun humanrights.ch. Quest rapport na saja anc betg vegnì publitgà, ma saja avant maun a la gasetta da la dumengia.
Sco gia ils ultims onns sajan persunas da pel stgira daventadas il pli savens unfrendas da rassissem. Ma er persunas dal spazi arab u asiatic sajan pertutgadas. Il pli savens sajan las persunas pertutgadas vegnidas discriminadas al plaz da lavur (133 cas) u en il sectur da furmaziun (116 cas).
Glieud è pli sensibilisada per il tema
Tenor la presidenta da la Cumissiun federala cunter il rassissem, Martine Brunschwig Graf, na munta quai dentant betg automaticamain ch’i dettia er dapli rassissem en Svizra. Cunquai che la populaziun saja pli sensibilisada en chaussa, saja probabel che tant persunas pertutgadas sco er perditgas da cas da rassissem sa drizzian als posts da cussegliaziun.
Or da l'archiv:
