Ils resultats èn stads tut auter che cuntentaivels per Cuira 97 durant questa stagiun d'atun. Sulettamain 13 puncts ord 13 gieus, plaz 11 da 14 equipas. E quai per in'equipa che ha atgnamain la finamira da dar davanttiers en la 2. liga interregiunala.
Cumenzà ha la stagiun anc cun in success. En l'emprim gieu ha Cuira gudagnà cunter Amriswil cun 3:2. Ma suenter han las miserias cumenzà tar l'equipa da la chapitala. Quai sin il plaz sco er sper il plaz.
Puspè ina giada ina midada da trenader
Cun Maximilian Knuth han ins pudì pensar ch'ina tscherta constanza ha finalmain chattà la via tar Cuira 97. El ha surprendì il cumenzament 2019 la batgetta da l'emprima equipa. La stagiun da corona 2019/2020 era l'equipa perfin sin plazza 1, cura ch'il campiunadi è vegnì annullà. Era en la stagiun 2020/2021 ha Cuira mussà bunas prestaziuns ed è stà da chattar en l'emprim terz da la tabella. Suenter onns turbulents cun bleras midadads da trenader parevi uschia sco sch'il Tudestg vegn finalmain da stabilisar Cuira 97 e da dar ina tscherta ruassaivladad al club.
Ma il ballape è magari incalculabel. Gia la stad haja dà tschertas malruassaivladads tranter il giugadur-trenader e tscherts giugaders e la suprastanza, ha Tino Schneider, president dal club ditg envers RTR. Las prestaziuns flaivlas da l'emprima equipa sco era differenzas internas hajan manà che Maximilian Knuth è la fin finala vegnì relaschà mez october. Quai malgrà ch'el era popular tar ils aspectaturs.
Cun Alexandar Zarkovic (28) ha in giugader surpiglià il post sco trenader. El vegn sustegnì dal chapitani blessà, Carlo Bearth (31). Spezialmain lez haja las ultimas emnas fatg buna lavur da tegnair ensemen l'equipa, sco Tino Schneider raquinta. Carlo Bearth è gia dapi il 2016 en il club ed enconuscha l'uniun.
Tgi che vegn a manar l'equipa proxima primavaira n'è anc betg cler. Ina pussaivladad realistica saja dentant che Alexandar Zarkovic resta trenader da Cuira 97. In giugader-trenader na vegni dentant betg pli a dar, tenor Tino Schneider. Sche Zarkovic maina vinavant l'equipa, lura mo sco trenader fix. E plinavant èsi cler che l'equipa vegn puspè a vesair or auter che quest atun. Ils Sursilvans Rafael Deplazes e Marino Cavegn (omadus Schluein Glion) bandunan il club. I vegn era speculà che ulteriurs giugaders vegnan anc ad ir davent. I spetga pia in enviern plain sfidas sin il club da remplazzar quels giugaders da tschep.
Cler è che l'entir club giavischa ch'i turna finalmain ina tscherta ruassaivladad tar il meglier club da ballape en il Grischun.
