Cuira 97 sa separa per immediat da ses trenader Maximilian Knuth. Quai ha communitgà il club da la segunda liga interregiunala sin Facebook. Las flaivlas prestaziuns da l'emprima equipa da las davosas emnas sco era differenzas internas hajan manà a questa decisiun. Cuira ha pers tschintg da las ultimas sis partidas ed è suenter nov gieus mo sin plazza 10 da 14 equipas.
Plinavant na sajan era ils giugaders Stefan Lukic e Andrea Lo Re betg pli part da l'emprima equipa. Uschia spera Cuira 97 ch'i dettia puspè dapli ruaus en la squadra per ils proxims gieus. Maximilian Knuth aveva surpiglià l'emprima equipa da Cuira 97 l'enviern 2019. Ad interim surpiglia il giugader Aleksandar Zarkovic (28) il post sco giugader-trenader. El vegn sustegnì dal capitani Carlo Bearth (31), ch'è actualmain blessads.
