Siglir tar il cuntegn

Header

cuntegn

25 giugaders nominads Yakin ha nominà Xhaka sco chapitani da la naziunala

Il trenader naziunal Murat Yakin ha nominà total 25 giugaders per dar ils dus gieus da test encunter l'Engalterra ed il Cosovo. Debutants n'ha el elegì nagins, dentant stattan puspè sin il plaz Granit Xhaka, Breel Embolo, Steven Zuber e Nico Elvedi.

L'onn dal campiunadi mundial cumenza glindesdi cun in trenament da tschintg dis a Marbella en la Spagna dal Sid, sco er ils dis suenter cun ils dus gieus da test a Londra cunter Engalterra (26 da mars) ed a Turitg encunter il Cosovo (29 da mars). Questa giada ha Yakin pudì tscherner propi da tut ils megliers giugaders. Tut tgi ch'è da num e da pum è da la partida – e Yakin ha declerà ch'el na veglia far nagins experiments. Sche tuts sajan fits, saja la situaziun comfortabla.

Tar questa situaziun tutgia er che Granit Xhaka è puspè da la partida Il chapitani aveva manchentà pervi da corona e pervi d'ina blessura al schanugl tut ils exercizis dapi che Yakin è trenader. L'atun è l'equipa sa qualifitgada senza Xhaka per il campiunadi mundial.

Vinavant senza Seferovic

Dasper Xhaka tutgan cun Breel Embolo, Steven Zuber e Nico Elvedi trais ulteriurs giugaders da pitga tar la nominaziun. Il trio ha manchentà il november pervi da blessuras ils gieus decisivs da la qualificaziun encunter l'Italia e la Bulgaria. Elvedi è il mument en isolaziun pervi da corona. El duess dentant puspè esser fit sin ch'i va en la Spagna.

Vinavant betg part dal cader fa l'attatgader Haris Seferovic, raschun è ina blessura vi dal ventrigl.

video
Yakin envers SRF davart ils proxims mais
Or da Sport-Clip dals 18.03.2022.
laschar ir. Durada: 1 minuta 2 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga