Siglir tar il cuntegn

Header

cuntegn

5avla etappa Tour de Ski Kläbo e Neprjajewa distanzieschan concurrenza

  • Johannes Kläbo gudogna a moda suverana la 5avla etappa dal Tour de Ski sur 15 kilometers classic e po uschia distanziar la concurrenza en il classament.
  • Jonas Baumann è sa classà sin posiziun 17.
  • Natalia Neprjajewa gudogna la 5avla etappa dal Tour de Ski sur 10 km classic ed ha uschia schlargià la distanza al chau dal classament.
  • Nadine Fähndrich è sa classada sin plazza 27 tar il start da massa en la Val di Fiemme.
video
Kläbo gudogna er la 5avla etappa
Or da Sport-Clip dals 03.01.2022.
laschar ir. Durada: 48 Secundas.

Johannes Kläbo ha danovamain mussà sia dominanza en la 5avla etappa dal Tour de Ski. Il Norvegiais è sa distanzià gia quatter kilometers avant l'arrivada da ses contrahents. En l'arrivada ha el gì 20 secundas avantatg sin il segund, Iivio Niskanen.

Per Kläbo èsi gia la quarta victoria d'etappa en quest tour. Cun sia 46avla victoria en la cuppa mundiala, ha el plinavant pudì egualisar il record da ses cumpatriot Björn Dählie. Cun tant avantatg sin sia concurrenza, è sia victoria gia tant sco segirs. Avant l'ultima etappa ha Kläbo 2 minutas avantatg sin il segund, Alexander Bolschunow.

Baumann meglier Svizzer

Senza la preschientscha da Dario Cologna èsi stà oz sur tut Jonas Baumann che ha pudì persvader. L'um da 31 onns è ì sin rang 17 ed ha uschia pudì francar anc pli ferm sia plazza en il classament dals top 20. Roman Furger (36.)), Cyril Fähndrich (49.) e Candide Pralong (53.) han manchentà ils puncts. Beda Klee ha desistì dal start.

video
Baumann: «Hai empruvà da mantegnair la bandiera Svizra»
Or da Sport-Clip dals 03.01.2022.
laschar ir. Durada: 1 minuta 3 Secundas.

Neprjajewa ina classa per sai

video
Neprjajewa schlargia distanza al chau dal classament
Or da Sport-Clip dals 03.01.2022.
laschar ir. Durada: 49 Secundas.

Natalia Neprjajewa ha gudagnà suenter il sprint da sonda er la 5avla etappa dal Tour de Ski. La Russa ha gudagnà il start da massa sur 10 km classic cun radund 3 secundas avantatg sin Heidi Weng e Krista Parmakoski.

Neprjajewa aveva pendì giu ina gruppa da sis tar l'ultim toc ensi ed ha uschia procurà per la differenza. En il classament general ha ella anc schlargià la distanza. Avant l'ultima etappa da mardi ha ella in avantatg dad 1:12 minutas davant la segunda, Ebba Andersson.

Fähndrich va per puncts

Las Svizras n'han betg pudì tegnair cun cun las meglras. Nadine Fähndrich ha pers il contact cun il chau gia baud ed è sa classada sco 27avla, cun in temp dad 1:52 minutas retard sin Neprjajewa. Lydia Hiernickel sto vinavant temair per sia selecziun per ils gieus olimpics. Ella è vegnida 45avla.

video
Fähndrich: «Hai sentì gia l'entschatta ch'jau sun vida»
Or da Sport-Clip dals 03.01.2022.
laschar ir. Durada: 1 minuta 36 Secundas.

Uschia vai vinavant

Mardi cuntinuescha il Tour de Ski cun la 6avla ed ultima etappa en la Val di Fiemme. L'ultim toc dal tour maina sur 10 km stil liber sin la renumada Alpe Cermis.

RTR novitads 14:00

Artitgels legids il pli savens