Las duas golias grischunas, Livia Peng da Domat e l’Engiadinaisa da La Punt, Seraina Friedli, pon ir al campiunadi mundial da ballape da quest onn en l’Australia ed en la Nova Zelanda. Ellas duas figureschan sin la glista da nominaziun da las 23 giugadras che la trenadra naziunala Inka Grings ha nominà per quest turnier che cumenza en bun duas emnas. Sco golia numer 1 ha Inka Grings però nominà Gaëlle Thalmann che dat tar Betis Sevilla.
Davos Thalmann è Livia Peng il numer 2 e Seraina Friedli il numer 3. Friedli era gia vegnida nominada per il campiunadi d’Europa avant in onn, dentant gia lura stuì sa cuntentar cun la rolla da reserva.
Uss mesemna dat la naziunala svizra da las dunnas in davos gieu da test per quest campiunadi mundial, quai a Winterthur encunter il Maroc. La fin d’emna scola l’equipa lura vers la Nova Zelanda. Al campiunadi mundial frunta la Svizra en la fasa da gruppa l’emprim sin las Filippinas, lura sin la Norvegia e lura sin l’ospitant, la Nova Zelanda. Il turnier cumenza ils 20 da zercladur e dura exact in mais. Il final è ils 20 d’avust a Sydney.
