Murat Yakin è il nov trenader da la naziunala svizra da ballape. Il Basilais da 46 onns ha suttascrit in contract enfin la fin da la qualificaziun per il campiunadi mundial il 2022, cun opziun da prolungar. Quai ha communitgà la Federaziun da ballape svizra. Ils ultims dus onns ha Yakin trenà il FC Schaffusa en la Challenge League. Yakin che ha da sez 49 gieus per la naziunala svizra, succeda cun quai al trenader d'enfin uss, Vladimir Petkovic.
Yakin cumenza per immediat a trenar cun la naziunala. Il prim da settember dat la Svizra numnadamain gia l'emprim gieu da test encunter la Grezia. Quatter dis pli tard suonda la segunda partida encunter l'Italia.
Gia passa 10 onns experientscha sco trenader
Trenà ha Yakin en Svizra gia las equipas da Thun, Lucerna, il FC Basilea, ils Grasshoppers e Sion en la Super League. Plinavan ha el er gia lavurà en Russia tar Spartak Moskau.
Cun Thun è el promovì il 2010 sco trenader giuven da 36 onns en la Super League. Cun Lucerna è el vegnì segund ed ha cuntanschì il final da la cuppa il 2012. Cun il FCB è el vegnì duas giadas campiun, il 2013 e 2014. En la Champions League ha el duas giadas battì Chelsea il 2013ed è sa qualifitgà en l'Europa League per ils mezfinals il 2013.
