2. liga interregiunala
Cuira 97 na vegn betg or da la fora. La meglra equipa da ballape grischuna ha gia pers per la terza giada en seria. Cunter il leader da la segunda liga interregiunala – il FC Weesen – sto l'equipa d'Aleksander Zarkovic sa cuntentar la sonda cun in 0:1. Cuira 97 sa glischna pli e pli fitg en il cumbat da relegaziun. Cun sulettamain in punct en la runda da primavaira è la squadra da la chapitala mo pli sin posiziun 11 da la tabella ed uschia sulettamain ina plazza sur il stritg.
2. liga interregiunala
2. liga regiunala
Domat vegn la dumengia ad in pari 1:1 ordaifer cunter il FC Ruggell. E la sonda ha la US Schluein Glion ch'è a la cua da la tabella, era recaltgà in punct en il gieu cunter KF Dardania Son Gagl. Quai cun in pari da 2:2. Igl è gia la segunda giada en seria, e la terza giada en la runda da primavaira ch’ils Sursilvans giogan pari. L’equipa sa chatta dentant cun otg puncts vinavant a la cua da la tabella. Domat è cun 14 puncts sin rang 10, gist sur il stritg.
Resultats 2. liga
3. liga regiunala
La dumengia ha il CB Trun/Rabius pers a chasa cunter il FC Weesen cun 1:3. Er ina terrada hai dà per il CB Lumnezia, a Vella perdan ils Lumnezians cunter Sargans cun 0:1. Ina victoria percunter avevi dà la sonda per il CB Surses. Grazia al 2:1 cunter Glaruna han els uss 12 puncts, sa chattan dentant vinavant sin posiziun 11 da la tabella. Lumnezia resta cun 2 puncts a la cua da la tabella, entant ch'il CB Trun/Rabius sa chatta da nov sin posiziun 6.
