L’onn passà èn Rolf e Pierina gia stads a la partenza dal 4Islands Epic en la Croazia, in dals frars pitschens dal Cape Epic che cuzza 5 dis. Questa cursa han els dumagnà cun bravura e terminà sin il podest sco terzs en la categoria mixed.
Cun il Cape Epic va uss però en vigur in siemi. La cursa en l’ost da Cape Town vala numnadamain sco la pli dira e pretensiusa cursa da mountainbike dal mund e vegn perquai er numnada il Tour de France dals mountainbikers.
Project da famiglia
Rolf e Pierina Beeli èn pronts per l’aventura Cape Epic. Dapi l’atun èn els sa preparads ed han trenà minuzius sin questa cursa extrema, er suenter in plan da trenament ch’il figl e frar Andrin ha mess ensemen. Andrin Beeli è tranter auter stà avant trais onns a la partenza dal Cape Epic ensemen cun l’Engiadinais Fadri Barandun.
Er quest onn è Andrin a la partenza, quai cun il collega talian Lorenzo Trincheri. Er fatg il viadi en l’Africa dal Sid ha la mamma Daniela ch’è responsabla per la cuschina ch’è immens impurtanta durant quels otg dis da cursa.
Chalira, pulvra, suaditsch e spiert da team
Dasper il profil da cursa e las distanzas èn cunzunt las cundiziuns climaticas ina gronda sfida. Savens èn las temperaturas fitg autas e sin ils trutgs e trails en la regiun da Stellenbosch e Montagu poi avair blera pulvra.
Il Cape Epic pretenda tut, corporalmain e mentalmain. Per simular la chalira han Rolf e Pierina Beeli er trenà durant las davosas emnas a chasa sin la rolla cun resti da skis, vons e chapitscha. La finamira è da cuntanscher l’arrivada, senza accidents e pli gronds incaps, ma cun bleras emoziuns.