Cape Epic 2026 - Rolf e Pierina Beeli – la mesadad è dumagnada

Etappa 4 (87 km / 1750 m d’autezza)

In si e giu en la regiun da Greyton

Il duo sursilvan, Rolf e Pierina Beeli, termineschan era la quarta etappa cun partenza ed arrivada a Greyton sut ils top 15. Er en il classament general èn ils mument classads sin plaz 15. Fin uss èn ils Beelis stads prest 24 uras sin il velo, bun 5 uras pli ditg ch’il duo che dominescha quella categoria mixed, ils dus spezialists da la cuppa mundiala da cross-country, Jenny Rissveds da la Svezia e Simon Andreassen dal Danemarc.

Dirs cumbats tar ils umens d'elita, clera chaussa tar las dunnas d'elita

Tar ils umens d’elita ha il duo talian cun Luca Braidot e Simone Avondetto, grazia al segund plaz en l’etappa, pudì augmentar l’avantatg a la testa dal classament general sin 1:37 minutas avant ils Sidafricans Matthew Beers e Tristan Nortje. Gudagnà l’etappa a Greyton han il Tudestg Luca Schwarzbauer ensemen cun Sam Gaze da la Nova Zelanda. Per el dus èsi la secunda victoria d’etappa a quest Cape Epic.

Resultats Cape Epic 2026

Alessandra Keller e Candice Lill restan suveran a la testa dal classament general da las dunnas d’elita, quai malgrà ch’ellas n’han per l’emprima giada betg terminà l’etappa sisum il podest. Gudagnà han piz a cup l’Americana Kate Courtney e la Taliana Greta Seiwald ch’ha cun lur buna tactica pudì batter per l’emprima giada il duo svizzer-sidafrican.

Etappa 3 (134 km / 1750 m d’autezza)

La pli lunga etappa da Montagu a Greyton

Rolf e Pierina Beeli èn constant bain da viadi al Cape Epic. Er la terza etappa han els dumagnà cun bravura e terminà quella sut ils top 15 en la categoria mixed, quai cun in retard da bun in’ura sin ils favurits e dominaturs en questa categoria, la Svedaisa Jenny Rissveds ed il Danais Simon Andreassen che fan era furora en la cuppa mundiala da cross-country. En il classament general ha il duo Sursilvan cun bab e figlia fatg in pass enavant sin il 14avel plaz da bunamain 50 teams.

Tar ils umens d’elita ha il Svizzer Felix Stehli e ses partenari sidafrican, Marc Pritzen, pudì festivar l’emprima victoria al Cape Epic. Els han gudagnà terza etappa cun in avantatg da passa ina minuta sin Wout Alleman da la Belgia e il Tschec Martin Stosek. Terzs èn vegnids ils Talians Luca Braidot e Simone Avondetto ch’han surpiglià la testa en il classament general. Il duo talian maina quel cun in avantatg dad 1:13 minutas sin ils Sidafricans Matthew Beers e Tristan Nortje.

Keller e Lill ina classa per sa sezzas

Tar las dunnas d’elita han Alessandra Keller ensemen cun la Sidafricana Candice Lill er gudagnà l’etappa 3 ed uschia augmentà vinavant l’avantatg a la testa dal classament generala. Quel munta da nov a bunamain 5 minutas sin l’Americana Kate Courtney e la Taliana Greta Seiwald ch’han er terminà la terza etappa sin plaz 2.

Etappa 2 (102 km / 2250 m d’autezza)

Emprima giada sur 100 kilometers

La furma constat. Rolf e sia figlia Pierina Beeli han mussà in’etappa excellenta e manchentà be per paucas minutas in plaz sut ils top 10 en lur categoria mixed. Bab e figlia da Sagogn èn vegnids 13avels en in’ulteriura etappa cun partenza ed arrivada a Montagu. En il classament general han els uschia gudagnà in plaz ed èn da nov classads sco 16avels. Suveran a la testa èn ils gronds favurits, la Svedaisa Jenny Rissveds ed il Danais Simon Andreassen ch’han er battì l’entira concurrenza en questa segunda etappa.

Tar ils umens d’elita han il Tudestg Luca Schwarzbauer e Sam Gaze da la Nova Zelanda surpassà sco emprims la lingia da l’arrivada. Vinavant a la testa dal classament general restan ils Sidafricans Matthew Beers e Tristan Nortje. L’avantatg sin ils segunds, il duo talian cun Luca Braidot e Simone Avondetto munta dentant be a 2,2 secundas.

Impressiuns da Rolf e Pierina Beeli

Alessandra Keller e Candice Lill domineschan vinavant

Betg da franar èn Alessandra Keller e sia collega sidafricana Candice Lill. Ellas han er gudagnà questa etappa sur 83 km cun 1750 m d’autezza ed uschia augmentà l’avantatg a la testa dal classament general sin 3:31 minutas sin l’Americana Kate Courtney e la Taliana Greta Seiwald.

Etappa 1 (90 km / 2150 m d’autezza)

Uss hai cumenzà pir da dretg

Rolf e sia figlia Pierina Beeli èn bain da viadi. Er l’emprima etappa sur 90 kilometers a Montagu han ils Sursilvans dumagnà cun success e terminà questa etappa sin plaz 16 da passa 60 equipas en la categoria mixed. En il classament general restan els sin il 17avel plaz. A la testa èn Jenny Rissveds da la Svezia e Simon Andreassen dal Danemarc ch’han suenter il prolog er gudagnà l’etappa 1.

Tar las dunnas d’elita han Alessandra Keller e sia collega Sidafricana Candice Lill era dà en il tun durant l’emprima etappa. Ellas han gudagnà cun in avantatg da 1:35 minutas, ed uschia er augmentà l’avantatg a la testa dal classament general sin bunamain 3 minutas. Per las dunnas d’elita è l’emprima etappa stada be 70 kilometers lunga cun 1'800 m d’autezza.

Impressiuns da Rolf e Pierina Beeli

Tar ils umens d’elita han gudagna questa etappa Wout Alleman da la Belgia ensemen cun il Tschec Martin Stosek. A la testa dal classament general restan ils Sidafricans e gronds favurits Matthew Beers e Tristan Nortje.

Discletg per Andrin Beeli e ses collega Lorenzo Trincheri. Tar l’emprima descensiun ha il Talian rut ina roda uschia ch’els han stuì ir radund 30 kilometers a pe enfin ch’els èn vegnids da reparar, meglier detg da midar ora la roda.

La cursa è uschia sa chapescha stada a fin, mo il duo Sursilvan-Talian n'ha betg dà si. Beeli e Trincheri han la finala cuntanschì l’arrivada suenter 7 uras – cun in retard da 3 uras e 20 minutas sin ils pli sperts umens d’elita.

Prolog (20 km / 650 m d’autezza)

Rolf e Pierina Beeli han cumenzà bain

La partenza al Cape Epic è fatga, quai cun success. Ils Beeli’s han terminà il prolog sin il 17avel plaz cun in retard da 14:48 minutas sin ils favurits en la categoria mixed, la Svedaisa Jenny Rissveds che parta ensemen cun il Danais Simon Andreassen.

Impressiuns da Rolf e Pierina Beeli

Partenza optimala er per Alessandra Keller ch’è per l’emprima giada al Cape Epic. Keller ensemen cun la Sidafricana Candice Lill han gudagnà il prolog cun in avantatg da bunamain ina minuta. Tar il umens d’elita han gudagnà ils Sidafricans Matthew Beers, ch’ha gia triumfà trais giadas a questa cursa extrema da chasa, e Tristan Nortje, quai piz a cup avant ils Talians Luca Braidot e Simone Avondetto. Terzs cun in retard da strusch 13 secundas èn vegnids il Svizzer Marc Stutzmann ed il Spagnol David Valero Serrano. Andrin Beeli, il frar da Pierina, ha ensemen cun il Talian Lorenzo Trincheri terminà il prolog sin plaz 23. L’Engiadinais Fadri Barandun ed il Tudestg Lasse Reuss èn vegnids 27avels.

Rolf e Pierina Beeli – 8 dis al limit

L’onn passà èn Rolf e Pierina gia stads a la partenza dal 4Islands Epic en la Croazia, in dals frars pitschens dal Cape Epic che cuzza 5 dis. Questa cursa han els dumagnà cun bravura e terminà sin il podest sco terzs en la categoria mixed.

Cun il Cape Epic va uss però en vigur in siemi. La cursa en l’ost da Cape Town vala numnadamain sco la pli dira e pretensiusa cursa da mountainbike dal mund e vegn perquai er numnada il Tour de France dals mountainbikers.

Project da famiglia

Rolf e Pierina Beeli èn pronts per l’aventura Cape Epic. Dapi l’atun èn els sa preparads ed han trenà minuzius sin questa cursa extrema, er suenter in plan da trenament ch’il figl e frar Andrin ha mess ensemen. Andrin Beeli è tranter auter stà avant trais onns a la partenza dal Cape Epic ensemen cun l’Engiadinais Fadri Barandun.

Era quest onn è Andrin a la partenza, quai cun il collega talian Lorenzo Trincheri. Er fatg il viadi en l’Africa dal Sid ha la mamma Daniela ch’è responsabla per la cuschina ch’è immens impurtanta durant quels otg dis da cursa.

Chalira, pulvra, suaditsch e spiert da team

Dasper il profil da cursa e las distanzas èn cunzunt las cundiziuns climaticas ina gronda sfida. Savens èn las temperaturas fitg autas e sin ils trutgs e trails en la regiun da Stellenbosch e Montagu poi avair blera pulvra.

Il Cape Epic pretenda tut, corporalmain e mentalmain. Per simular la chalira han Rolf e Pierina Beeli era trenà durant las davosas emnas a chasa sin la rolla cun resti da skis, vons e chapitscha. La finamira è da cuntanscher l’arrivada, senza accidents e pli gronds incaps, ma cun bleras emoziuns.