La skiunza oriunda da Schlarigna ha cunzunt mussà bunas prestaziuns constantas en la Cuppa d’Europa. Grazia al segund plaz en il classament dal slalom gigant ha ella uschia er in plaz fix en la cuppa mundiala per la stagiun 2025/26. Cun returnar en il cader da Swiss Ski croda dentant cunzunt davent il squitsch finanzial. La stagiun passada ha numnadamain custà a Vanessa Kasper radund 70’000 francs.
La davosa stagiun ha dentant er purtà bler a la skiunza engiadinaisa. Ella haja pudì decider bler sezza, pudì trenar fitg individualmain e flexibel. En mintga cas haja ella emprendì ina massa, er per la vita, uschia Vanessa Kasper che sa legra però er fitg dad esser enavos en il cader per pudair profitar da las structuras da Swiss Ski e per pudair trenar ensemen cun sia collegas.
La finamira per la stagiun 2025/26 saja da sa classar regularmain sut las top 30 en il slalom gigant, sia disciplina da parada. Ed il grond siemi fissi da dastgar ir a la partenza als proxims gieus olimpics, il favrer 2026 a Cortina d’Ampezzo.
Il cumbat per puncts e tschientavels
Suenter che la sportista da 28 onns aveva pers sia posiziun en la squadra da cader, ha ella stuì decider sch’ella vul terminar sia carriera u cuntinuar per ses agen quint. Ella ha tschernì la segunda opziun e surmuntà bain las sfidas organisatoricas e finanzialas. Sustegn en furma da raps ha Vanessa Kasper ramassà surtut grazia a bunas colliaziuns en ses conturn.
Cun raps da sponsurs da bun 60'000 francs avessi da bastar per organisar e finanziar tut sez questa stagiun da skis.
Suenter il trenament da stad – tranter auter en Nova Zelanda – ha la stagiun da skis cumenzà per la sportista engiadinaisa cun ina sconfitta. Ella n’ha numnadamain betg savì segirar ina plazza da partenza per l’emprima cursa da la stagiun a Sölden. Quai causa in differenza da temp da be 8 tschientavels durant la qualificaziun sin la Diavolezza.
Grond success a Sestriere
Tuttina n’ha Vanessa Kasper betg capitulà ed è sa participada a numerusas cursas da la cuppa europeica, nua ch’ella figurescha actualmain sin il segund plaz. Swiss Ski ha nominà ella er per singulas cursas da la cuppa mundiala. A Sestriere en Italia ha ella lura cuntanschì en il slalom gigant ses meglier resultat enfin ussa cun in 18avel rang.
Jau sun enorm grata per las bunischmas cursas ils ultims dis, quai è in pass fitg impurtant per mai en la gista direcziun.
Sia independenza pudess esser ina clav per ses success, perquai ch'ella trenescha pli conscientamain e sa concentrescha sin l'essenzial, uschia Vanessa Kasper.
