La finala ha Niklas Hartweg cuntanschì l’arrivada cun in retard da 34,4 secundas sin la Norvegia ch’ha gudagnà la cursa principalmain en la loipa. Da sajettar han ils Norvegiais fatg tuttina blers sbagls sco il duo svizzer, numnadamain 9. Plaz trais ed uschia gudagnà bronz ha il duo franzos ch’ha la finala pers be ina secunda sin ils Svizzers.
Wiestner perda la medaglia per la staffetta svizra
La Svizra ha manchentà be per pauc da gudagnar l’emprima medaglia al campiunadi d’Europa da biatlon a Lai. En la staffetta maschedada ha il quartet svizzer cun Lea Meier, Lena Häcki-Gross, Sebastian Stalder e Serafin Wiestner stuì sa cuntentar cun il quart plaz.
Fin tar la davosa visita en il stan da sajettar ha la Svizra cumbattì per la medaglia da bronz encunter la Svezia. Durant ch’il Svedais Anton Ivarsson n’ha fatg nagins sbagls da sajettar sin pes ha Serafin Wiestner tuc be duas da tschintg schibas. La finala ha il biatlet da Trin anc stuì far ina runda da chasti ed uschia stuì sutterrar la medaglia avant ils fans e l’arena da chasa. Wiestner ha lura cuntanschì l’arrivada cun exact ina minuta retard sin il terz plaz.
Gudagnà ha a moda suverana la Norvegia avant la Germania (+25 secundas). Ils Norvegiais che valevan sco gronds favurits han fatg durant l’entira staffetta be dus sbagls da sajettar ed en la loipa n’èn els strusch stads da franar.
