Ditaji Kambundji è la nova campiunessa europeica sur ils 100 meters obstachels tar las atletas sut 23 onns. Cun in temp da 12, 68 secundas ha ella distanzià la concurrenza per bunamain trais dieschavels ad Espoo en la Finlanda. Ultra da quai n' ha la Bernaisa da 21 onns betg mo meglierà ses agen record per dus tschientavels, mabain er realisà in nov record europeic dals U23.
Collecziun da medaglias crescha
Per Ditaji Kambundji èsi la segunda medaglia dad aur a concurrenzas internaziunalas: Avant dus onns ha ella gia gudagnà il titel al campiunadi europeic a Tallinn. Da lez temp anc en la categoria dals U20.
Ma er tar l'elita ha Ditaji Kambundji gia festivà gronds success. Avant in onn ha ella gudagnà bronz al campiunadi europeica a Minca. Er bronz hai dà per la sora da Mujinga Kambundji dacurt al campiunadi europeic en la halla ad Istanbul.
