L'Italia manchenta per la terza giada en seria il campiunadi mundial da ballape. Gia il 2022 e 2018 han ils Talians stuì guardar tiers. Quant grond è uss l'interess en l'Italia per quest campiunadi en l'America dal Nord? Per tgi tegnan ils Talians ils poleschs? Guardan els insumma ils gieus? E tgi è la culpa che l'Italia n'è betg da la partida? In drama da ballape naziunal che para da far mal a l'olma taliana.
Chiavenna
A Chiavenna sin via audan ins gronda dischillusiun, ch’ils Azzurri n'èn betg sa qualifitgads – er passa dus mais suenter la fin da la qualificaziun. L’interess per quest campiunadi mundial è perquai crudà vers nulla tar in pèr indigens en l'Italia. Ma sch'ins dumonda enturn, chatt'ins er da quels che n'han betg pers l'interess, era senza la participaziun da la squadra Azzurra.
Memia blers daners – memia pauc «sport»
Ma pertge han ils Talians insumma manchentà la qualificaziun, per la terza giada en seria? Quai ch’ins auda pli savens: Ch'ils clubs talians hajan memia ditg pli gugent cumprà en buns giugaders esters e negligì da trair suenter e da promover ils agens buns giugaders. Quai haja era da far cun ils daners ch'ils clubs pon gudagnar cun giugaders esters. Ils indigens ston prest pajar insatge, per pudair giugar en l'Italia.
Tegnair ils poleschs ad auters
Quants buns giugaders ch'in pajais ha, na dependa betg da sia grondezza, aud'ins pliras giadas. L’entira situaziun saja disfortunada. Ma ch'ins possia era tegnair ils poleschs ad autras equipas naziunalas, sch'ina manca. Per ils tifosi dad Inter Milaun saja la schelta l’Argentina. Auters «tifosi» tegnan ils poleschs a la Svizra, auters als Tudestgs, auters als Franzos.
Ma i dat er Talians ch'èn s'allontanads cumplettamain dal ballape, betg mo dal ballape talian. La terza giada en seria che la squadra Azzurra n'è betg qualifitgada per il campiunadi mundial para d'avair rut insatge en la relaziun da la glieud en l'Italia cun lur sport naziunal, il «calcio».