Dapi l'onn 2016 dat Nico Elvedi per la squadra naziunala A. Ses emprim gieu ha el giugà cunter la Belgia, dapi lura dat el regularmain per la squadra naziunala.
Nico Elvedi n'ha betg mo in num rumantsch mabain era ragischs rumantschas. RTR ha avant in pèr onns fatg retschertga e chattà la colliaziun da Nico Elvedi cun la Rumantschia.
Il tat da Nico Elvedi è Walter Elvedi. Gia passa 40 onns vivan el e sia dunna a Dübendorf. Era sch'el ha gia en fitg giuvens onns bandunà Cumbel nua ch'el è naschì e creschì si, en ses cor saja el restà in Lumnezian ed in Rumantsch.
Sias emprovas da dar vinavant il rumantsch a ses figl ed a sia figlia na sajan betg gartegiadas. Era sch'els hajan durant lur uffanza adina puspè visità la Lumnezia. Deplorablamain na sa uschia era Nico Elvedi betg rumantsch.
Era questa giada da la partida
Questa fin d'emna è Nico Elvedi era da la partida en il quartfinal cunter l'Argentina. Il gieu ha lieu durant la notg tranter sonda e dumengia a las 03:00 temp svizzer.
En divers lieus en Svizra, sco per exempel era a Cuira datti notgs libras cun public viewings a las 03:00.