La delegaziun svizra ch’è preschenta tar ils campiunadis mundials da passlung da junioras e juniors a Planica en Slovenia procura per ina ulteriura medaglia. Isai Näff, il passlunghist da 20 onns da Sent vegn vice campiun mundial da juniors en la cursa sur 10 kilometers en il stil classic. Suenter las plazzas quatter e tschintg en las emprimas duas cursas che Isai Näff è ì a la partenza, segua uss la segunda plazza e la medaglia d’argient per il giuven passlunghist rumantsch. Be il svedais Alvar Myhlback è anc stà pli spert che il passlunghist rumantsch.
Insumma han ils curridurs rumantschs mussà bunas prestaziuns. Niclas Steiger da Samedan è vegni 5avel , Jon-Fadri Nufer da Sedrun 11avel e Roman Alder da Puntraschigna 12avel.
Terza medaglia svizra tar ils campiunadis mundials en Slovenia
Per l’emprima medaglia svizra tar ils campiunadis mundials da junioras e juniors ed en la categoria sut 23 onns ha procurà Marina Kälin da San Murezzan. Ella ha gudagnà la concurrenza sur 20 kilometers. Gist suenter ha era Fabrizio Albasini da San Murezzan gudagnà bronz tar ils umens. Omadus medaglias èn stadas magari er ina pitschna surpraisa. Gist la medaglia dad aur da Marina Kälin n'era betg da spetgar.
Suenter las emprimas duas medaglias segua uss anc ina terza, l’emprima tar ils juniors, vul dir tar las curriduras e curridurs fin a 20 onns. Che Isai Näff da Sent è en furma ha el mussà durant las emprimas duas cursas cun las plazza quatter e tschintg. Il titel da vice campiun mundial è dentant er per el ina pitschna surpraisa. Er quella medaglia n'era betg da spetgar. Segir è questa medaglia il pli grond success dal giuven passlunghist engiadinais.
