Isai Näff è stà ditg sin curs da medaglia en la cursa da distanza dals juniors sut 20 onns. A la fin è il giuven passlunghist dal Club da skis Lischana Scuol vegnì 5avel cun in retard da 2:29 minutas. Per bronz han entant be 14 secundas mancà al giuven talent engiadinais.
Persvadì ha er Jon-Fadri Nufer. Il Tujetschin ha ditg cumbattì per in plaz en ils top 10. A la fin è il frar giuven da Cla-Ursin Nufer vegnì 11avel cun in retard da 4:18 minutas. Sco Isai Näff è er Jon-Fadri Nufer per l'emprima giada ad in campiunadi mundial da ski nordic.
Ina trumpada hai percunter dà per Niclas Steiger, in dals gronds favurits. Il Turitgais che viva entant dapi intgins onns a Samedan ha stuì sa cuntentar cun il 50avel plaz.
Gudagnà a moda suverana ha il Norvegiais Joergen Nordhagen. El ha gia baud pudì sa distanziar da l’entira concurrenza e la finala triumfà cun in avantatg da passa duas minutas sin il duo talian cun Aksel Artusi e Davide Ghio.
Anina Hütter en las top 30
Tar las dunnas ha Ramona Schöpfer procurà per il meglier resultat svizzer. La Lucernaisa è vegnida 12avla en la cursa da 20 kilometers en il stil liber. Mussà ina buna cursa ha er Anina Hütter. La sportista da Trimmis che ha er lantschà ina carriera en il sport da mountainbike è vegnida 26avla. Sin la victura taliana Maria Gismondi ha Hütter pers 3:39 minutas. Per la Grischuna da 18 onns èsi l'emprim campiunadi mundial en il sport da ski nordic.
