Siglir tar il cuntegn

Header

Cla-Ursin Nufer
Legenda: Actualmain po Cla-Ursin Nufer sulet siemiar da far cursas. Swiss-Ski, Stephan Bögli
cuntegn

Passlung Plaschair e tristezza tar ils Nufers

Pli differentas na pudessan las emoziuns betg esser tar ils dus fragliuns Cla-Ursin (22) e Jon-Fadri (19) Nufer. Durant che Cla-Ursin patescha dapi il cumenzament da la stagiun da surtrenament, è ses frar giuven vegnì selecziunà per l’emprima giada per ils campiunadis mundials dals juniors.

Per Jon-Fadri èsi ina premiera. Grazia a sias bunas prestaziuns da questa stagiun – quai en las cursas da FIS ed en l'Alpen Cup – dat Swiss Ski ad el la schanza da parter als campiunadis mundials dals juniors sut 20 onns a Planica en la Slovenia. El po pia uschia currer sin quellas loipas, nua che l’elita mundiala ha cumbattì l’onn passà per las medaglias.

Il plaschair è immens ed insatge tut spezial ch’jau dastg ir a quels campiunadis mundials. Jau ma legrel propi fitg.
Autur: Jon-Fadri Nufer passlunghist U20

L’emprima finamira saja da giudair questas cursas e da far il meglier pussibel. I fiss dentant bel da cuntanscher en ina u l'autra cursa in plaz sut ils top 15, uschia il giuven Tujetschin. Il siemi a lunga vista è lura da sa participar ina giada en la cuppa mundiala e concurrenzar cun ils megliers dal mund. Perquai stoppia el principalmain anc lavurar in zic vid sia tecnica. Là haja el anc in grond deficit.

audio
Jon-Fadri Nufer als campiunadis mundials dals juniors
ord Actualitad dals 01.02.2024. Maletg: mad
laschar ir. Durada: 3 minutas 24 Secundas.

Dà la davosa glimada per ils campiunadis mundials a Planica che cuzzan dals 5 fin ils 11 da favrer ha Jon-Fadri Nufer al Maraton da la Surselva, nua ch’el è vegnì terz.

In temp sgarschaivel

Cuntrari a Jon-Fadri ha ses frar grond, Cla-Ursin, il mument pauc da rir. El patescha dapi il cumenzament da la stagiun da surtrenament. Fin oz ha el pudì far gnanc ina cursa.

audio
Cla-Ursin Nufer patescha da surtrenament
ord Actualitad dals 01.02.2024. Maletg: RTR
laschar ir. Durada: 3 minutas 45 Secundas.

Il problem: Cla-Ursin ha trenà memia fitg, memia savens e memia intensiv durant la stad e dà memia pauc pausa al corp. In sbagl ch’ha uss consequenzas fatalas. Enstagl che las battarias fissan chargiadas èn quellas quasi vidas, il corp na po betg pli. Il mument na dastga il passlunghist dal cader B da Swiss Ski era betg trenar intensivamain. Durant quest'entira fasa è el era sut controlla d'in medi, d'in cussegliader da nutriment sco era d'in trenader mental.

Quai fa dolurs. Ins trenescha l’entira stad per lura pudair ir top fit a la partenza al cumenzament da la stagiun.
Autur: Cla-Ursin Nufer passlunghist cader B Swiss Ski

Uss stoppia el mirar tiers, quai che n'è betg simpel.

Il sulet positiv: I saja er ina scolaziun per la vita, uschia Cla-Ursin Nufer. Quest sbagl na vegnia el franc mai pli a far. Per il Tujetschin èsi in dals dirs muments en sia carriera anc giuvna . Uss ha el la speranza d'almain anc pudair ir a la partenza al Maraton da l’Engiadina u forsa als campiunadis svizzers da passlung la fin mars a Realp. Avant in onn era Cla-Ursin Nufer daventà per l’emprima giada campiun svizzer en la cursa da persecuziun sur 15 kilometers.

RTR Actualitad 08:00

Artitgels legids il pli savens