Gian Gilli chamina cun egls rients atras l’areal dal campiunadi mundial da hockey a Turitg-Altstetten. L’anteriur manager da sport ama il contact cun la glieud, quai è ses mund. Bler onns ha Gian Gilli da Bever organisà occurrenzas da sport. Sco per exaimpel il campiunadi mundial da skis l’onn 2003 a San Murezzan, ni er il davos campiunadi mundial da hockey il 2009 a Berna e Kloten. Gian Gilli è stà il mainagestiun dal campiunadi mundial da hockey l’onn 2020. Pervia da la pandemia da corona è quel campiunadi mundial dentant vegni annullà paucas emnas avant l’emprima partida.
Sco «Head of happiness» e voluntari da la partida
Ch'il campiunadi mundial 2020 n’ha betg gì lieu era per Gian Gilli ina frida. El di: «Quatter onns hai jau lavurà per nagut. Quai è sta difficil». Uschia eri bod cler ch'il fan da hockey s’angaschess questa giada sco voluntari per il pli grond turnier da hockey dal mund. Uschia è naschida l’idea dal «Head of happiness». Gian Gilli gida dapertut nua che quai fa da basegn. Ed el procura per buna luna tar ils voluntaris. 1600 voluntaris gidan cun persvasiun al campiunadi mundial da hockey en Svizra per che tut funcziuna uschia sco ch'ins giavischa.
Vesair l’autra vart dad in eveniment
Ins na sto betg adina esser schef dad ina occurrenza. Ins sa far er bler sco voluntari. Quai di Gian Gilli da sia rolla sco voluntari tar il campiunadi mundial da hockey. Ed el gida nua ch'el sa e po. Or d’atgna experientscha sa el co ina occurrenza gronda funcziuna, ed el sa, nua ch'i po dar problems. Sper il fatg ch'el gida sez là, nua che quai fa basegn discurra el er tar mintga occasiun cun ils voluntaris. Dumonda a quels che na stattan betg en il focus co i marscha e sche tut è en urden. E sche i dat in problem, alura emprova l’Engiadinais da schliar quel.
