- Nino Schurter vegn segund en la cursa da «Cross-Country» ad Albstadt en la Germania – e quai gist davos il Brit Tom Pidcock. Sco terz è suandà il Rumen Vlad Dascalu.
- Alessandra Keller vegn sco meglra Svizra sin plazza 5 en la cursa da «Cross-Country».
- Er Jolanda Neff (9avla) e Sina Frei (10avla) èn sa plazzadas sut las top 10. Gudagnà la cursa ha Rebecca McConnell da l'Australia.
Sper la victoria suverana dal campiun olimpic Tom Pidcock – ch'è sa distatgà da ses concurrents anc avant che la mesadad da la cursa era fatga – ha era Nino Schurter pudì persvader. La finala è el sa rangà cun 20 secundas retard sin plaz 2. Il Grischun è restà durant l'entira cursa part da la gruppa persequitadra ed ha pudì scurlattar giu ses concurrent da la Rumenia Vlad Dascalu durant la davosa runda. Uschia resta Schurter a la testa dal classament general da la cuppa mundiala.
Segund meglier Svizzer en la cursa da «Cross-Country» è stà Filippo Colombo sco 8avel. Mathias Flückiger ha gì en la penultima runda in defect vi da ses velo ed ha fatg rang 13.
Svizras era sut ils top 10
Las dunnas han manchentà ina plazza da podest – Alessandra Keller vegn sco 5avla meglra svizra, Jolanda Neff è sin plazza 9 davant Sina Frei e Linda Indergand. Gudagnà la cursa da «Cross-Country» tar las dunnas ha l'Australiana Rebecca McConnell.
