Nagin plaz da podest per ils bikers svizzers
Luca Schätti è stà il meglier Svizzer en la cursa da cross-country da la cuppa mundiala a Lai. Il Turitgais da 26 onns ha gudagnà il duel per plaz 7 cunter il Tessinais Filippo Colombo che terminescha la cursa sco 8avel. Omadus han pers bunamain 2:23 minutas sin ils pli sperts. Cun Dario Lillo sco 10avel ha anc in terz svizzer cuntanschì in plaz sut ils top 10. Fabio Püntener è vegnì 15avel.
Ina cursa d’emblidar èsi per Vital Albin. Il Lumnezian ch’era vegnì avant in onn 8avel a Lai – ed era uschia stà il meglier Svizzer – ha quest onn stuì sa cuntentar be cun il 42avel plaz. Per Vital Albin è la cursa dentant er gia stada baud a fin. El è ina giada cupitgà, curt suenter ha el anc in plat. Insumma n’èsi betg ì sco giavischà a l’equipa da Thömus maxon. Ils collegas d’equipa da Vital Albin, Lars Forster, è vegnì be 62avel e Matthias Flückiger schizunt disqualifitgà damai ch’el è vegnì stuschà d’in mecanist en zona tecnica suenter avair midà ina roda.
Victoria dubla per ils Franzos
Procurà per la musica a Lai han quest onn ils mountainbikers franzos. Luca Martin ha gudagnà avant Adrien Boichis. Martin ha però er profità che Boichis è crudà en la davosa runda, quai ch’ha procurà per la decisiun. Cumplettà il podest sco terz ha il giuven american Bjorn Riley che fa part a l’equipa Scott-Sram da Thomas Frischknecht, a la quala Nino Schurter ha fatg part l’entira carriera.
Uss fa la cuppa mundiala da mountainbike pausa duas emnas avant ch’i va vinavant cun cursas a La Thuile en l’Italia (3-5 da fanadur). Vital Albin nizzegia quai temp per in camp da trenament en l’autezza, quai fa el en l’Engiadina.
Premiera da podest per Blöchlinger
Ronja Blöchlinger da l’Appenzell Dadora è vegnida segunda a Lai ed ha uschia festivà ses emprim plaz da podest en ina cursa da cross-country da la cuppa mundiala. Gia il venderdi en la cursa da short track aveva Blöchlinger persvadì cun il segund plaz.
Gudagnà la cursa a moda suverana ha Jenny Rissveds. La Svedaisa è scappada gia baud da l’entira concurrenza e la finala cuntanschì l’arrivada cun in avantatg da bunamain ina minuta sin Ronja Blöchlinger. Per Jenny Rissveds èsi gia la terza victoria a Lai suenter il 2016 ed il 2019. Cumplettà il podest sco terza ha l’Americana Savilia Blunk.
Quatter Svizras sut las top 10
Las mountainbikeras svizras han mussà ina buna prestaziun d’equipa a Lai. Gist in entir quartet ha cuntanschì in plaz sut las top 10. Sco quarta è Sina Frei stada la segunda meglra svizra. Per in plaz sin il podest han la finala mancà 10 secundas. Nicole Koller è vegnida 7avla e Ramona Forchini 9avla.
Betg ì sco giavischà èsi a Jolanda Neff ed ad Alessandra Keller. Neff ha terminà la cursa sco 17avla e Keller, la victura da l’onn passà, è crudada en l’emprima runda, ha pers bler temp, e la finala cuntanschì l’arrivada be sco 19avla.
Duas Svizras sin il podest en il short track
Ils mountainbikers svizzers han lantschà la cuppa mundiala a Lai cun dus plazs da podest en il short track. Tar las dunnas è Ronja Blöchlinger vegnida segunda davos l’Americana Savilia Blunk. Cumplettà il podest sco terza ha Alessanda Keller ch’è partida cun in mountainbike cun rodas da 32 zoll. Anc avant paucs onns è vegnì fatg la midada da 26 sin 29 Zoll. Uss para da cumenzar ina nova èra e tenor Keller sai il traject da cursa a Lai ideal per testar quest bike pli grond.
Er las ulteriuras Svizras han persvadì. Nicole ha manchentà il podest sco quarta be per tschintg secundas. Sina Frei è vegnida 6avla, Jolanda Neff 11avla e Ramona Forchini ha terminà la cursa da short track sco 17avla.
Tar ils umens ha Dario Lillo manchentà il podest be per pauc. La finala è il giuven dal chantun Son Gagl vegnì 5avel. Filippo Colombo ha terminà la cursa sco 7avel e Fabio Püntener è vegnì 11avel. Vital Albin ha mussà ina cursa solida ed è la finala vegnì 21avel – uschia ch’el dastga parter la dumengia ord la terza retscha per la cursa principala da cross-country.
10 onns - ediziun da giubileum
Dapi la premiera il 2015 è Lai daventà ina da las adressas impurtantas en il chalender da cursas da la cuppa mundiala da mountainbike. E la tribuna al pe dal Rothorn ha scrit durant il davos decenni numerusas istorgias e procurà per bler spectacul ed emoziuns.
Nino Schurter – il star da Lai
Il punct culminant durant tut quels onns è stà il campiunadi mundial dal 2018 ch’ha carmalà a la partenza 55 naziuns, uschè bleras sco anc mai avant. Tut en tut han radund 65’000 aspectaturas ed aspectaturs visità questas cursas. Lai è daventà in magnet per ils fans dal sport da mountainbike.
Era durant quest campiunadi mundial ha Nino Schurter procurà per il mument il pli emoziunal en l’istorgia da la cuppa mundiala a Lai. Cun ses 7avel titel da campiun mundial avant ils fans da chasa ha Nino Schurter scrit istorgia svizra da sport. Ils cloms «Nino, Nino, Nino» a l’ur dal traject da cursas han marcà ina entira èra, cloms ch’èn daventads legendars, quai fin il 2025. L’onn passà ha Nino Schurter terminà sia carriera a sia cursa da chasa. Oz è el expert da mountainbike tar la televisiun svizra SRF.
Per ils Svizzers in emprim punct culminant
Er quest onn stattan atletas ed atlets svizzers en il focus. Tar las dunnas tutgan cunzunt Sina Frei ed Alessandra Keller, ch’ha triumfà avant in onn a Lai, tar las grondas favuritas. Tar ils umens vul la generaziun giuvna enturn Dario Lillo, Fabio Püntener, Luca Schätti u Filippo Colombo far furora. Ma er Matthias Flückiger vul cun ses 37 onns mussar ch’el è anc adina ferm avunda per tegnair pitg cun ils megliers dal mund.
Ord vista grischuna stat cunzunt Vital Albin en il focus. Avant in onn aveva il mountainbiker oriund da Tersnaus persvadì sco 8avel e meglier Svizzer. Betg a la partenza è Ginia Caluori da Panaduz che sa participescha actualmain al Tour de Suisse.