Siglir tar il cuntegn

Header

Lauberhorn, Wengen, Marco Odermatt
Legenda: Marco Odermatt sur il Hundschopf avant ina culissa che fa tut pel-giaglina. Keystone
cuntegn

Cuppa mundiala al Lauberhorn Ina festa da skis superlativa

Quatter cursas, aura da siemi, ina culissa magnifica, millis da fans e cun Marco Odermatt in Svizzer che gudogna omaduas cursas rapidas. Las cursas da la cuppa mundiala a Wengen han tegnì quai ch’ellas han empermess.

audio
Andreas Wieland: «Il sport da skis è anc adina immens populars»
ord Actualitad dals 15.01.2024. Maletg: Keystone
laschar ir. Durada: 9 minutas 52 Secundas.

Igl è stà ina gronda festa da skis en la Part Sura Bernaisa. Be la sonda a la cursa, la cursa rapida dal Lauberhorn han bunamain 40’000 fans fatg il viadi a Wengen. Las cursas al pe dad Eiger, Mönch e Jungfrau han mussà ina gia dapli con populars ch’il sport da skis è en Svizra. Suenter il classicher dad Adelboden e quel dal Lauberhorn spetga uss gia il proxim grond classicher, quel da Kitzbühel. L’entir tross da la cuppa mundiala fa uschia uss direct il viadi vers l’Austria.

video
Marco Odermatt: «Da quels duels sco cun Sarrazin profiteschan tuts»
Or da Sport-Clip dals 13.01.2024.
laschar ir. Durada: 1 minuta 35 Secundas.

Marco Odermatt procura per la gronda show

Il retg dal Lauberhorn 2024 è senza dubi Marco Odermatt. L’actual meglier skiunz dal mund ha mess ils millis da fans en extasa a Wengen. Odermatt ha gudagnà tant la cursa rapida scursanida sco er la cursa rapida originala cun partenza il pli sisum. Igl èn stadas sias emprimas victorias da la cuppa mundiala en questa disciplina ed uschia in ulteriur siemi ch’è in en vigur. Plinavant è el vegnì segund en il super-G davos il Franzos Cyprien Sarrazin.

Il skiunz da 26 onns dal chantun Sutsilvania è il mument il grond star en la cuppa mundiala da skis, per blers in fenomen. E grazia a quests success las davosas duas emnas en la Part Sura Bernaisa, avant ses fans da chasa, è Odermatt er sin la meglra via da gudagnar per la terza giada en seria il classament da la cuppa mundiala.

Program da mamut procurà per discussiuns

Las cursas al Lauberhorn han procurà per bler spectacul, han dentant er fatg tegnair en diversas giadas il flad. Plirs skiunzs èn cupitgads, per part grevamain. Tranter auter han il Svizzer Marco Kohler, il Franzos Alexis Pinturault ed il Norvegiais Aleksander Aamodt Kilde stuì vegnir transportads davent cun helicopter direcziun ospital.

video
Beat Feuz: «Gea, trais cursas en seria è bler, ed ils dis èn fitg lungs»
Or da Sport-Clip dals 13.01.2024.
laschar ir. Durada: 2 minutas 36 Secundas.
video
Markus Waldner: «Ins sto vesair ils fatgs e na dastga betg maschadar las chaussas»
Or da Sport-Clip dals 13.01.2024.
laschar ir. Durada: 4 minutas 9 Secundas.

Kohler e Pinturault han rut il liom cruschà. Per omadus è la stagiun da skis uschia ida a fin a Wengen. Kilde da l’auter maun è mitschà cun in egl blau. El n’ha naginas ruttadiras, sulet fermas contusiuns. Cura che Kilde po turnar enavos sin pista n’è anc betg cler.

Trais cursas spertas en trais dis, vitiers anc dus trenaments, e quai sin la pli lunga pista da la cuppa mundiala, quai ha procurà per bleras discussiuns e per part ferma critica. Ils strapatschs memia gronds, quai è il facit.

video
Niels Hintermann: «Igl è in strapatsch brutal»
Or da Sport-Clip dals 13.01.2024.
laschar ir. Durada: 3 minutas 29 Secundas.

Wengen aveva surpiglià ina cursa rapida da Beaver Creek ch’era dada en l’aua al cumenzament da la stagiun pervia da l’aura. Er la proxima fin a Kitzbühel stattan sin il program duas cursas rapidas ed in slalom.

 

RTR Actualitad 17:00

Artitgels legids il pli savens