Siglir tar il cuntegn

Header

video
Aleksander Aamodt Kilde perda la controlla en il Ziel-S e cupitgà grevamain
Or da Sport-Clip dals 13.01.2024.
laschar ir. Durada: 2 minutas 24 Secundas.
cuntegn

Suenter cupitgada en il Ziel-S Fin da la stagiun per Kilde

Per Aleksander Amodt Kilde è la stagiun a fin anticipadamain. Quai ha ditg il medi dal team norvegiais en la televisiun. Kilde era cupitgà grevamain la sonda tar la segunda cursa rapida dal Lauberhorn. El è anc vegnì operà il medem di a Berna. Ossa na saja betg rutta, dentant haja el mess ord lieu ina spatla, tschiffà contusiuns ed in tagl vi dal ventrigl.

Kilde è malgrà tut pia mitschà cun in egl blau. Suenter ses accident era gia vegnì speculà ch’el haja pliras ruttadiras. La dumengia aveva la Federaziun da skis norvegiaisa communitgà che tut na saja betg uschè dramatic.

Aleksander è vegnì operà la dumengia en l’ospital a Berna. El ha dischlocà la spatla e taglià in ventrigl. El ha be intginas contusiuns, dentant naginas ruttadiras”
Autur: Federaziun da skis norvegiaisa

«Jau vegn tgirà da la unica Mikaela Shiffrin», uschia è Aleksander Kilder s’annunzià suenter sia cupitgada sin Instagram. Il Norvegiais aveva vitiers publitgà ina fotografia ord l’ospital ensemen cun sia amia americana.

Il Norvegiais aveva pers la controlla en il Ziel-S da la pli lunga cursa rapida da la cuppa mundiala ed è silsuenter collidà fermamain en la rait da protecziun. Kilde era bain tar schientscha, ha dentant tuttina stuì vegnir transportà davent cun helicopter. La cursa è stada interrutta bun ina mes’ura. Quant ditg che Kilde croda ora n'è anc betg enconuschent.

video
Rottensteiner: «Ils rapports en las medias na pudain nus betg confermar»
Or da Sport-Clip dals 13.01.2024.
laschar ir. Durada: 1 minuta 59 Secundas.

Mintga di in accident

Malgrà che Aleksander Aamodt Kilder, il victur da la cursa rapida dal Lauberhorn dal 2022 e 2023, è ì a la partenza a Wengen cun betg esser dal tut fit è el vegnì tar l’emprima cursa rapida da la gievgia segund en il super-G dal venderdi terz. Tenor ses trenader Michael Rottensteiner hajan ins la finala decidì ensemen dad er parter la sonda a la cursa rapida cun partenza il pli sisum.

La gievgia era il Svizzer Marco Kohler cupitgà grevamain ed il venderdi il Franzos Alexis Pinturault. Omadus han gì dapli discletg. Tant Kohler sco er Pinturault han tranter auter rut il liom cruschà. Per omadus è la stagiun da skis uschia a fin.

audio
Per tadlar: las novitads da las 08:00
ord RTR Audio dals 15.01.2024.
laschar ir. Durada: 4 minutas 29 Secundas.

RTR Novitads 10:00

Artitgels legids il pli savens