La famiglia da la cuppa mundiala da bob e skeleton ha fatg fermativa a San Murezzan. Las cursas en l’unica bobera natirala dal mund èn stadas las penultimas avant las cursas tar ils gieus olimpics a Milano e Cortina. Lasuenter impurtantas èn stadas las cursas da chasa.
Cédric Follador setavel cun il bob da quatter
Suenter la dischillusiun e la sedeschavla plazza cun il bob a dus, ha il pilot indigen Cédric Follador cuntanschì ina plazza da top ten cun il bob da quatter. Il pilot da Bever ha timunà ses bob sin plazza set. Suenter l’emprima cursa era Follador anc sin plazza trais. Durant la segunda cursa ha el dentant fatg in u dus sbagls dapli, ed ha terminà la cursa sin plazza set.
Trais equipas svizras tranter ils megliers diesch
Il pli ferm Svizzer cun il bob da quatter era Michael Vogt ch’è vegni terz. Uschia gudogna el er la medaglia da bronz dal campiunadi europeic. Cédric Follador è vegni sco menziunà setavel – ed il terz pilot svizzer Timo Rohner cun il stumplader Livio Matossi da San Murezzan è vegni novavel.
Per Livio Matossi ch'ha midà pir avant dus onns tar il sport da bob, avant era el passlunghist – eran quai pir las segundas cursas en la cuppa mundiala. Grazia als buns resultats po el anc adina siemiar dad ir sco part dal team Rohner als gieus olimpics 2026.
