Uss è ella finida e vegnida surdada al traffic da concurrenzas. La nova bobera a Cortina. Ditg n'è betg stà cler sch'ils organisaturs dals proxims gieus olimpics il favrer 2026 a Cortina vegnan a fin cun il nov chanal da glatsch per las concurrenzas da bob e skeleton. Il comité internaziunal olimpic IOC aveva er prendì en egl la pussaivladad da pudair sviar cun las concurrenzas olimpicas en la bobera dad Innsbruck/Puntina. Uss dentant è tut vegnì a fin. A Cortina han ils organisaturs lavurà di e notg vi da la construcziun dal nov chanal da glatsch e quel è vegnì surdà la fin da november al manaschi da cursa.
Cédric Follador il meglier pilot da bob svizzer a Cortina
Igl è ina da las cundiziuns che infrastructura olimpica sto vegnir testada avant las occurrenzas grondas sut cundiziuns da cursa. Usitadamain han lieu mintgamai l’enviern avant l’occurrenza gronda cursas da la cuppa mundiala al lieu olimpic. A Cortina n'è quai però betg capità, pervia che las lavurs da construcziun eran d’ina tala maniera en retard. Perquai hai dà al cumenzament da la nova stagiun l'emprova generala. Malgrà ch'i vegn anc adina fabritgà enturn la bobera han ils pilots e las pilotas da bob, dentant er dal skeleton pudì testar il chanal da glatsch sut cundiziuns da cursas. E la premiera è grategiada.
Jau sun fitg surprendì che la bobera è uss construida. Nus tuts essan fitg cuntents da quai.
Dus giadas tranter ils megliers diesch
A Cédric Follador da Bever è la premiera en il nov chanal da glatsch a Cortina gartegiada. Duas giadas, vul dir cun il bob a dus, dentant er cun la schlitta gronda (bob a quatter), è Follador vegnì tranter ils megliers 10. El è uschia stà il pli ferm pilot svizzer. Grazia als buns resultats dastga el segir semiar dals gieus olimpics. Cun fitg gronda probabilitad è el da la partida il favrer dal 2026 cura ch’ils megliers pilots dal mund cumbattan a Cortina per medaglias olimpicas.