Siglir tar il cuntegn

Header

cuntegn

Cuppa mundiala da biatlon Lai Hattrick per Justine Braisaz-Bouchet

La biatleta franzosa Justine Braisaz-Bouchet è la gronda victura da l’emprima cuppa mundiala da biatlon a Lai. Suenter la cursa da sprint e la cursa da persecuziun gudogna Braisaz-Bouchet er la cursa cun partenza en massa che vala sco la cursa roiala en il biatlon.

video
Justine Braisaz-Bouchet – la regina da Lai
Or da Sport-Clip dals 17.12.2023.
laschar ir. Durada: 32 Secundas.

Justine Braisaz-Bouchet è ina da paucas che ha tutgà tut las 20 schibas ed uschia triumfà avant las duas soras svedaisas Elvira Öberg (+5,5 secundas) e Hanna Öberg (+10,6 secundas) ch’han mintgamai fatg dus sbagls da sajettar, dentant persvadì en la loipa.

video
Justine Braisaz-Bouchet: «Jau charez quest percurs da cursa»
Or da Sport-Clip dals 17.12.2023.
laschar ir. Durada: 53 Secundas.

Nagin exploit da Lena Häcki-Gross

La suletta svizra a la partenza, Lena Häcki-Gross, ha stuì sa cuntentar cun il 17avel plaz. Dà or da maun in meglier resultat ha la biatleta dad Engelberg en il stan da tir. Ella ha fatg gist tschintg sbagls da sajettar ed uschia pers passa duas minutas sin la victura franzosa Justine Braisaz-Bouchet.

video
Lena Häcki-Gross: «Jau ma legrel enorm sin il campiunadi mundial en in onn»
Or da Sport-Clip dals 17.12.2023.
laschar ir. Durada: 1 minuta 55 Secundas.

Lena Häcki-Gross è stada la suletta biatleta svizra a la partenza en questa cursa cun las meglras 30 da la cuppa mundiala.

Biatlets Norvegiais ina classa per sasez

Il grond dominatur dals davos onns n’è betg stà da franar en la davosa cursa da la cuppa mundiala da biatlon a Lai. Johannes Thingnes Bö ha gudagnà a moda suverana la cursa cun partenza en massa, quai malgrà dus sbagls da sajettar. Per Thingnes Bö èsi stà la 77avla victoria da la cuppa mundiala. A Lai ha il Norvegiais triumfà avant ses dus cumpatriots Johannes Dale-Skjevdal (+14,6 secundas) e ses frar Tarjei Bö (+21,8 secundas). Er sin il plaz tschintg e sis èn classads dus norvegiais ch’han uschia dominà dad A fin Z questa cursa roiala.

Prestaziuns solidas dals Svizzers

Ils dus Svizzers Niklas Hartweg e Sebastian Stalder han mussà ina stupenta cursa avant ils fans da chasa. Hartweg è sco meglier svizzer vegnì 15avel (+1:17 minutas) cun dus sbagls da sajettar. Sebastian Stalder ch’è ditg stà sin ina plazza da top 10 ha la finala cuntanschì l’arrivada sco 20avel cun in retard da 1:24 minutas. Er el ha fatg dus sbagls da sajettar.

RTR actualitad 17:00

Artitgels legids il pli savens