Siglir tar il cuntegn

Header

cuntegn

Cuppa mundiala da biatlon Lai «Vive la France» en ils culms grischuns

Suenter il sprint gudogna la Franzosa Justine Braisaz-Bouchet er la cursa da persecuziun, quai avant sia cumpatriota Julia Simon ch’ha la finala pers 25 secundas sin 10 kilometers cun quatter giadas sajettar.

audio
Intervista cun Aita Gasparin suenter la cursa da persecuziun
ord Actualitad dals 16.12.2023. Maletg: Keystone
laschar ir. Durada: 3 minutas 12 Secundas.

Las duas biatletas franzosas èn stadas ina classa per sa sezzas ed han declassà la terza, la Norvegiaisa Marit Ishol Skogan per passa ina minuta.

video
Lena Häcki-Gross manchenta las top 10
Or da Sport-Clip dals 16.12.2023.
laschar ir. Durada: 1 minuta 20 Secundas.

Manchentà be per pauc in plaz sut las top 10 ha Lena Häcki-Gross. Malgrà quatter sbagls da sajettar ha la biatleta dad Engelberg fatg in pass dal 19avel sin il 11avel plaz. Sin la victura Justine Braisaz-Bouchet ha ella pers 1:56 minutas.

Betg pudì far in pass enavant en la cursa da persecuziun cun las meglras 60 dal sprint han las ulteriuras svizras. Amy Baserga ha terminà la cursa sco 36avla cun quatter sbagls da sajettar e las duas Grischunas, Lea Meier dal Partenz e l’Engiadinaisa Aita Gasparin, èn vegnidas 39avla e 40avla. Meier ha uschia pers 8 plazs envers il sprint, Gasparin 6 plazs. Omaduas han pers passa quatter minutas sin la victura franzosa.

audio
Biatlon Lai: Co persequiteschan ils fans las cursas?
ord Actualitad dals 16.12.2023. Maletg: RTR
laschar ir. Durada: 3 minutas 19 Secundas.

Festa norvegiaisa tar ils umens

En la cursa da persecuziun dals umens han ils biatlets norvegiais procurà per la gronda show. Gist quatter norvegiais èn classads sut ils top 5. Gudagnà la cursa ha il grond dominatur dals davos onns, Johannes Thingnes Bö. El ha triumfà avant ses cumpatriots Endre Stroemsheim e Sturla Holm Laegreid, quai malgrà che Bö ha fatg trais sbagls da sajettar, in dapli che Stroemsheim e dus dapli che Laegreid.

video
Niklas Hartweg fufrogna vid in plaz da top 10
Or da Sport-Clip dals 16.12.2023.
laschar ir. Durada: 40 Secundas.

Niklas Hartweg puspè il meglier svizzer

Per il meglier resultat svizzer ha sco gia el sprint Niklas Hartweg procurà. Suenter il 11avel plaz en il sprint è il giuven talent svizzers vegnì en la cursa da persecuziun 12avel. El ha fatg in sulet sbagl da sajettar e terminà la cursa cun in retard dad 1:19 minutas sin Johannes Thingnes Bö. Fatg in grond passa enavant ha Sebastian Stalder ch'è partì be sco 42avel suenter il sprint. Il meglier biatlet svizzer fin uss en questa stagiun ha er fatg be in sulet sbagl en il stan da tir e la finala terminà la cursa sco 24avel. Il terz svizzer a la partenza, Joscha Burkhalter, ha stuì sa cuntentar cun il 44avel plaz.

La dumengia spetgan a Lai las davosas cursas da la cuppa mundiala da biatlon, duas cursas cun partenza en massa.

Biatlon
Legenda: Gronda fiasta da biatlon en l'Arena a Lantsch. Keystone

RTR actualitad 17:00

Artitgels legids il pli savens