Lena Häcki-Gross ha dà ord maun in meglier resultat en il stan da tir. Cun trais sbagls da sajettar n’ha la biatleta dad Engelberg gì nagina schanza da cumbatter per in plaz da podest sco anc dacurt a Hochfilzen en l’Austria. En la loipa è Lena Häcki-Gross però stada ina da las sveltas.
Sin la victura, la Franzosa Justine Braisaz-Bouchet ha Lena Häcki-Gross la finala pers 1:45 minutas. Braisaz-Bouchet ha gudagnà il sprint avant la Norvegiaisa Ingrid Landmark Tandrevold e la Taliana Lisa Vittozzi. Tuttas trais èn vegnidas tras la cursa senza sbagls da sajettar. Segund meglra svizra è stada Amy Baserga sco 30avla cun in sulet sbagl da sajettar.
Meier e Gasparin qualifitgadas per la cursa da persecuziun
Ina buna cursa ha mussà Lea Meier dal Partenz. La giuvna biatleta da 22 onns è la suletta svizra che n'ha fatg nagins sbagls da sajettar. Ella è la finala vegnida 31avla ed ha uschia pudì sa qualifitgar suveran per la cursa da persecuziun da la sonda. Quai era la gronda finamira da Lea Meier ch’era vegnida il 2020 en questa Arena da biatlon a Lai campiunessa mundiala tar las junioras sut 19 onns.
Er da la partida a la cursa da persecuziun è Aita Gasparin ch’è vegnida 34avla en il sprint, quai cun 2 sbagls da sajettar. Gasparin ha pers bun duas minutas e mesa sin la victura franzosa Justine Braisaz-Bouchet. Betg pudì ir a la partenza ha Elisa Gasparin. Ella ha stuì dar forfait per las cursas da chasa a Lai pervia d’ina infecziun da corona.
