Igl è fin oz il pli grond event da sport ch’è vegnì organisà en questa Arena da biatlon. Questa cuppa mundiala che cuzza da gievgia fin dumengia, vala er gist sco l’emprova generala per il campiunadi mundial da biatlon il 2025 che vegn ad avair lieu sin las loipas a Lai.
La gronda sfida – il plaz. La gronda part dals parcadis ha stuì vegnir dischlocà in toc davent da l’arena. Ils organisaturs supplitgeschan e speran era che visitadras e visitaders fetschian il viadi a Lai cun il traffic public. Er la tenda da VIP sco la tenda da fans na sa chatta betg gest dasper l’arena. Plinavant è vegnì construì entamez l’arena ina tribuna uschè gronda sco anc mai cun ina vista sin il stan da tir.
Ina loipa cumpacta grazia a la naiv artifiziala
In zic mal il venter als organisaturs fa la plievgia e las temperaturas miaivlas. Per l’ina saja quai in problem cun il parcar sin ils prads di Guido Mittner, il responsabel per la logistica e l’infrastructura. Er a las loipas n’ha la plievgia betg fatg bain, era sche quellas sajan anc adina en in fitg bun stadi, er perquai ch’i saja vegni preparà tut las loipas da cursa cun naiv artifiziala. Uschia restian las loipas cumpactas di Silvio Baselgia, il responsabel per il ressort sport.
Tut en tut partan radund 200 atletas ed atlets or da 28 naziuns a quella cuppa mundiala da biatlon a Lai. Sin il program stattan cursas da sprint, cursas da persecuziun e cursas cun distanza en massa, quai tant per ils umens sco er per las dunnas.
