Marco Odermatt ha dominà la davosa stagiun da skis. 17 giadas è il skiunz da 24 onns stà sin in podest, 7 cursas ha el gudagnà ed a Peking è el daventà campiun olimpic en sia disciplina da parada – il slalom gigant. Marco Odermatt è arrivà sin l’olimp e vala il mument sco il meglier skiunz dal mund. El è il 5avel svizzer suenter Peter Lüscher, Pirmin Zurbriggen, Paul Accola e Carlo Janka che gudogna la culla gronda da cristal. Per l’Americana Mikaela Shiffrin èsi gia il quart triumf.
Feuz, Gisin e Gut-Behrami
Cun Beat Feuz, Michelle Gisin e Lara Gut-Behrami ha la Svizra anc gì ulteriurs garants per victorias e plazzas da podest. Tuts trais han persvadì tant en la cuppa mundiala sco er als gieus olimpics. Ord vista grischuna han principalmain Gino Caviezel e Stefan Rogentin procurà per bunas prestaziuns. Omadus tutgan tar ils megliers dal mund.
Trumpadas grischunas
Betg cuntent cun sia stagiun è Sandro Simonet. Il spezialist da slalom ha darar cuntanschì l’arrivada e stuì magunar ina terrada suenter l’autra. En nov slaloms hai dà be ina giada puncts per Simonet, quai la fin schaner a Schladming grazia al 21avel plaz. Il skiunz da Casti ha uschia er stuì sutterrar il siemi da dastgar parter als gieus olimpics. Er Jasmine Flury po esser cuntenta che la stagiun è a fin. Cun excepziun dal segund plaz en la cursa rapida da Garmisch-Partenkirchen la fin schaner n’è ella betg vegnida da clamar giu ses potenzial ils davos mais. Er als gieus olimpics a Peking ha ella manchentà tant en il super-G sco er en la cursa rapida in plaz sut las top 10.
Austria puspè naziun numer 1
La Svizra ha manchentà da gudagnar per la terza giada en seria il classament da las naziuns. Sisum il podest stat suenter dus onns puspè l’Austria ch’ha gudagnà quest classament cun in avantatg da 257 puncts sin ils Svizzers. Per la differenza han las dunnas austriacas procurà. Malgrà che skiunzas e skiunzs austriacs n’han gudagnà naginas cullas da cristal pon els profitar d’in mantun skiunzs che pon gudagnar puncts. La Svizra da l’auter maun viva vinavant d’atlets singuls.
Pers blers puncts envers il grond concurrent l’Austria han atletas ed atlets da Swiss Ski principalmain al cumenzament da la stagiun. E pervia da corona ha tranter auter Lara Gut-Behrami, ina garanta per puncts, manchentà gist diversas cursas enturn Nadal.