Il Lumnezian ha mussà ina reacziun suenter sia terrada en la davosa cursa da la cuppa mundiala ad Andorra (12avel). A Les Gets, là nua che Nino Schurter ha festivà avant in onn ses 10avel titel da campiun mundial, è Nino Schurter vegnì segund, quai cun in retard da 17 secundas sin il Franzos Victor Koretzky ch'aveva gia gudagnà il venderdi la cursa da short track. Cumplettà il podest sco terz ha il campiun d’Europa, il Rumen Vlad Dascalu (+21 secundas) ch’ha sin ils davos meters anc pudì batter il Svizzer Marcel Guerrini ch’ha sco quart manchentà il podest per be 5 secundas.
Nagut n'ha pudì franar Nino Schurter
Nino Schurter ha stuì parter or da la quarta retscha damai ch’el n’è betg stà a la partenza da la cursa da short track, quai ord motivs da sanadad. Il mountainbiker oriund da Tersnaus è stà malsaun l’emna passada. La partenza è dentant gartegiada fulminant a Schurter. Suenter paucas secundas era el gia a la testa. En la 6avla dad 8 rundas è Schurter però vegnì franà d’in defect tecnic. Sco gia tar la davosa cursa ad Andorra ha el gì in plat tar la roda davos. Sin la davosa runda ha el dentant anc ina giada dà gas e pudì far il pass enavant sin il segund plaz. Per Schurter èsi gia il quart plaz da podest en questa stagiun. Tranter auter ha el gudagnà la cursa da chasa a Lai e quella a la Val di Sole en l’Italia. Plinavant era Schurter anc vegnì terz a Nove Mesto.
Vital Albin sut ils top 15
Cun Mathias Flückiger sco 9avel (+1:52 minutas) e Joel Roth sco 10avel (+1:59 minutas) èn anc dus ulteriurs svizzers classads sut ils top 10. Vital Albin, l’auter mountainbiker da Tersnaus, ha cuntanschì l’arrivada sco 13avel (+2:20 minutas), quai suenter ch’el è stà ditg sin in plaz da top 10. Plinavant è il Tessinais Filippo Colombo vegnì 23avel .
Terrada per las Svizras
En la cursa da cross-country da las dunnas han las mountainbikeras svizras stuì magunar ina terrada. Persvadì ha sulet Nicole Koller sco 9avla. Cun quest plaz da top 10 ha la Turitgaisa realisà ses meglier resultat da la carriera. L’actual pli ferma svizra, Alessandra Keller è vegnida 13avla. Plinavant ha Sina Frei cuntanschì l’arrivada sco 15avla e Jolanda Neff sco 17avla.
Mitterwallner betg da franar
Sco gia tar la davosa cursa da la cuppa mundiala ad Andorra ha Mona Mitterwallner battì l’entira concurrenza. L’Austriaca ha uschia festivà sia segunda victoria en seria. A Les Gets ha ella triumfà cun in avantatg da 38 secundas sin l’Ollandaisa Puck Pieterse. Terza è vegnida la campiunessa mundiala, la Franzosa Pauline Ferrand-Prévot (+1:14 minutas) ch’è sco Nino Schurter era stada malsauna l’entira emna passada.
Podest per Ginia Caluori
In ulteriur plaz da podest ha Ginia Caluori cuntanschì en la cursa da cross-country sut 23 onns. La mountainbikera da Panaduz è vegnida terza, gist davos sia cumpatriota Ronja Blöchlinger. Gudagnà la cursa tar las dunnas U23 ha Samara Maxwell da la Nova Zelanda ch'aveva gia gudagnà aur als davos campiunadis mundials a Glasgow en la Scozia.
