Nino Schurter engrondescha vinavant ses record mundial. A Val di Sole en l‘Italia ha il mountainbiker oriund da Tersnaus festivà sia 35avla victoria en ina cursa da la cuppa mundiala da cross-country olimpic. E suenter sia victoria avant 3 emnas a Lai è quai gia la segunda victoria da la cuppa mundiala en questa stagiun.
Per Schurter èsi gia stà la 6avla victoria a Val di Sole. Plinavant è el er vegnì en quest lieu campiun mundial il 2021. Grazia a quest success è l'actual campiun mundial è da nov a la testa dal classament general.
Per la decisiun a Val di Sole ha Nino Schurter procurà en la quarta da sis rundas cura ch'il Lumnezian ha pudì sa distanziar da ses davos concurrent, il Sidafrican Alan Hatherly ch'ha la finala terminà la cursa be sco 6avel. Curt avant la davosa runda ha il Sidafrican l'emprim stuì laschar surpassar Mathias Flückiger ch'ha sco segund uschia procurà per ina victoria dubla per ils mountainbikers svizzers. Il Bernais ch'è vegnì da runda tar runda pli e pli ferms ha la finala pers 26 secundas sin Nino Schurter. Sco terz ha Vlad Dascalu cuntanschì l'arrivada, il Rumen ch'è vegnì avant in'emna campiun d'Europa. El ha pers 38 secundas sin Schurter. Cun Lars Forster sco 9avel ha anc in terz svizzer persvadì e cuntanschì in plaz sut ils top 10.
Betg ì sco giavischà èsi a Vital Albin. Suenter ina buna partenza ha il Lumnezian dà si la cursa suenter quatter da sis rundas. Ad el hajan las forzas mancà suenter gia duas rundas, uschia Vital Albin ch'è stà malsaun durant l'emna.
Puck Pieterse ina classa per sa sezza
Tar las dunnas d'elita ha danovamain gudagná la Ollandaisa Puck Pieterse, quai a moda suverana. Per la giuvna da 21 onns èsi gia la terza victoria en la quarta cursa da la stagiun. Pieterse ch'ha pudì stgappar gia en l'emprima da tschintg rundas da l'entira concurrenza ha la finala gudagnà a Val di Sole cun in avantatg da 52 secundas sin la Taliana Martina Berta. Cumplettà il podest sco terza ha l'Australina Rebecca Hendersen.
Jolanda Neff sco meglra svizra
Meglra svizra è vegnida Jolanda Neff. La campiunessa olimpica ha terminà la cursa sco 6avla, quai suenter in defect tecnic ch'ha bittà ella enavos sin il 37avel plaz. Alessandra Keller ha pers bun trais minutas ed è vegnida 11avla, Sina Frei ha terminà la cursa sin plazza 14.
La proxima cursa da la cuppa mundiala è la fin avust, suenter il campiunadi mundial en la Scozia, a Vallnord en l'Andorra.