Nino Schurter ha manchentà be per pauc sia 36avla victoria da la cuppa mundiala. Il mountainbiker oriund da Tersnaus è vegnì segund en la segunda davosa cursa da la stagiun a Snowshoe en ils Stadis Unids. Schurter ha la finala pers il sprint final encunter Jordan Sarrou. Il Franzos ch’era daventà il 2020 a Leogang en l’Austria campiun mundial stat uschia per l’emprima giada insumma sisum in podest en ina cursa da la cuppa mundiala.
Ina cursa quasi perfetga per ils Svizzers
Davos Nino Schurter cumplettescha Marcel Guerrini il podest sco terz. Per il mountainbiker dal chantun Son Gagl èsi ina premiera. Guerrini stat per l’emprima giada insumma en sia carriera sin in podest da la cuppa mundiala. Gia il settember a Les Gets en Frantscha aveva Marcel Guerrini persvadì e manchentà ses emprim plaz da podest entras ina cupitgada curt avant l’arrivada. La finala er’el vegnì quart.
A Snowshoe è Mathias Flückiger vegnì quart cun in retard da 10 secundas sin il victur Jordan Sarrou. Flückiger è uschia stà classà gist avant il campiun olimpic e campiun mundial Tom Pidcock. Il Brit è dentant ha dentant gì duas giadas defect en questa cursa, duas giadas ina platta tar la roda davant. Cun Filippo Colombo sco 9avel ha in ulteriur svizzer persvadì. Il Tessinais ch’è parti cun il numer 66 ed uschia quasi davostiers ha pers 39 secundas. Plinavant è Joel Roth vegnì 16avel e Vital Albin, l’auter mountainbiker da Tersnaus, 20avel cun in retard da 2:21 minutas.
Schurter parta sco leader en la davosa cursa
En il classament general da la cuppa mundiala da mountainbike resta Nino Schurter a la testa. Il Lumnezian ha avant la davosa cursa da la stagiun a Mont-Sainte-Anne en il Canada in avantatg da 89 puncts sin il Franzos Jordan Sarrou. Sin il terz plaz è Mathias Flückiger cun in dischavantatg da 167 puncts. Per ina victoria en la cursa roiala da cross-country datti 250 puncts, il segund survegn 200 puncts ed il terz 160 puncts.
Jolanda Neff persvada sco 5avla
Er en la cursa da cross-country da las dunnas hai dà ina premiera. L’Austriaca Laura Stigger ha gudagnà la cursa a Snowshoe en il stadi american da West Virginia ed uschia festivà sia emprima victoria en ina cursa da la cuppa mundiala tar l’elita. Stigger ha pudì sa distanziar gia baud da l’entira concurrenza e cuntanschì l’arrivada cun in avantatg da 23 secundas sin la Franzosa Loana Lecomte. Cumplettà il podest sco terza ha la Taliana Martina Berta.
Meglra svizra è vegnida Jolanda Neff sco 5avla cun in retard da 46 secundas. Per Neff èsi il meglier resultat en questa stagiun. Betg ì sco giavischà èsi perencunter a las ulteriuras svizras. Sina Frei è vegnida 14avla, Alessandra Keller ha stuì sa cuntentar cun il 15avel plaz e Linda Inderganda ha cuntanschì l’arrivada sco 17avla. Tuttas trais han pers passa 3 minutas sin la victura Laura Stigger. Plinavant è Nicole Koller anc vegnida 20avla.
Puck Pieterse gudogna cuppa mundiala generala
Motiv da far festa ha er Puck Pieterse. L’Ollandaisa ha grazia a ses 6avel plaz a Snowshoe gia decidì il classament general da la cuppa mundiala en questa stagiun, quai avant la davosa cursa a Mont-Sainte-Anne. La giuvna da 21 onns è uschia la successura d’Alessandra Keller che veva gudagnà avant in onn la cuppa mundiala generala da cross-country.
Ginia Caluori danovamain sin il podest
Procurà per in top resultat a Snowshoe ha er Ginia Caluori da Panaduz. La giuvna da 21 onns è vegnida terza en la cursa da cross-country da las dunnas sut 23 onns. Sin la victura Samara Maxwell da la Nova Zelanda ha Caluori pers 1:38 minutas. La Grischuna n’è dentant betg la suletta svizra sin il podest. Segunda è numnadamain vegnida Ronja Blöchlinger ch’è er a la testa da la cuppa mundiala generala tar las dunnas U23. Cun Noëlle Buri sco quarta ha anc in’ulteriura svizra persvadì a Snowshoe.
Nagin plaz da podest hai perencunter dà per ils umens svizzers sut 23 onns. Meglier svizzer è stà Maxime Lhomme sco 6avel. Il Grischun Janis Baumann dad Igis ha terminà la cursa sco 28avel. Gudagnà la cursa dals umens U23 ha il Canadais Carter Woods.
Da Snowshoe a Mont-Sainte-Anne
La proxima e davosa cursa da la cuppa en questa stagiun a Mont-Sainte-Anne en la provinza canadaisa da Québec è la proxima fin d’emna. Il venderdi, ils 6 d’october, stattan sin il program las cursas da short-track e la dumengia, ils 8 d’october spetgan las cursas da cross-country sur la distanza olimpica.
