Siglir tar il cuntegn

Header

video
Sina Frei: «Jau hai imaginà quai auter»
Or da Sport-Clip dals 05.09.2021.
laschar ir. Durada: 1 minuta 43 Secundas.
cuntegn

Cuppa mundiala MTB a Lai Defect custa il podest a Sina Frei

La Brita Evie Richards ha be in’emna suenter ses titel da campiunessa mundiala tar l’elita er gudagnà la cursa da la cuppa mundiala a Lai. Meglra Svizra è stada Sina Frei sco 5avla.

Evie Richards è il mument sin in’unda da success. En sia emprima cursa en il tricot da campiunessa mundiala ha la Brita triumfà a Lai avant l’Australiana Rebecca McConnell (+19 sec.) e la Svedaisa Jenny Rissveds (+58 sec.) ch’aveva gudagnà il venderdi la cursa da short track. Manchentà be per pauc il podest ha la Franzosa Loana Lecomte che gudogna grazia a quest resultat la cuppa mundiala generala 2021. Lecomte aveva gudagnà las emprimas quatter cursas da la cuppa mundiala.

Nagin plaz da podest per las Svizras a la cursa da chasa

Sina Frei, la campiunessa mundiala da short track, era sin via da daventar terza cura ch’in defect, ina platta tar la roda davos, ha franà la Turitgaisa curt avant l’arrivada. Uschia ha Sina Frei la finala stuì sa cuntentar cul il 5avel plaz. Sin la victura Evie Richards ha ella pers 1:20 minutas.

video
La midada dal pneu tar Sina Frei
Or da Sport-Clip dals 05.09.2021.
laschar ir. Durada: 1 minuta 51 Secundas.

Ina buna prestaziun ha er Alessandra Keller mussà. Ella è vegnida 7avla ed ha uschia realisà ses meglier resultat da la stagiun. Cun Linda Indergand sco 9avla e Nicole Koller sco 11avla han anc duas ulteriuras svizras persvadì en questa cursa da cross country a Lai.

Stuì magunar ina terrada ha Jolanda Neff. La campiunessa olimpica n’è insumma betg vegnida sin turas ed ha la finala terminà la cursa sco 25avla, quai cun in retard da passa sis minutas. Schanza da far revantscha ha Neff gia en duas emnas. Lura spetga a Snowshoe en ils Stadis Unids la davosa cursa da la cuppa mundiala en questa stagiun.

RTR novitads 14:00

Artitgels legids il pli savens