Cun Örebro HK da la Svezia è per l’emprima giada dapi sedesch onns puspè ina equipa svedaisa da la partida tar la Cuppa Spengler. Equipas svedaisas han era gia festivescha gronds success a Tavau. Färjestads BK per exempel ha gudagnà la Cuppa Spengler ils onns 1993 e 1994. Örebro è ina equipa fitg giuvna. Ella è vegnida fundada l’onn 1990. Cun Örebro turna Mathias Bromé a Tavau ch’ha giugà la stagiun vargada en il dress dal Club da hockey da Tavau. Da la partida sco aspectatur è er il Zuozingher e mez Svedais Marc Wolf.
Da Zuoz a Göteborg tar Frölunda
Cun be sedesch onns ha Marc Wolf fat il pass da l’Engiadina en la citad da Göteborg. Marc Wolf e creschi si a Zuoz cun ina mamma svedaisa. El ha pia ina stretga colliaziun cun la Svezia, ed uschia as ha quai dà che il giuven Marc Wolf ha pudì giugar diversas stagiuns cun equipas da juniors svedaisas. Wolf che ha emprais l’amulain da hockey tar il EHC San Murezzan ha nizzegià la schanza da far il pass en il hockey svedais. Quai cun la finamira da pudair dar ina giada en la pli auta liga da hockey svedaisa. Suenter quatter onns en Scandinavia ha Marc Wolf dentant decidì da turnar puspè en Svizra e da giugar cun il SC Langenthal, d’in quella giada anc en liga naziunala B.
Experientscha per la vita
Ils onns en Svezia han furmà il giuven Marc Wolf. En il pajais natal da sia mamma ha il hockeyan engiadinais emprais bler davart il patinar, la tecnica, il gieu cun il bastun, la tactica e la voluntad da cuntanscher insatge cun ina equipa. Ils onns en Svezia sun stads per el ina scola per la vita.
