Suenter la terrada cunter il Club da Hockey da Tavau, ha il Team Canada puspè mussà sia classa cunter ils Finlandais da Kalpa. Ils Canadais han gudagnà a moda suverana cun 6:3 cunter l'equipa nord-europeica. La basa per questa victoria ha il Canada mess gia en las emprimas minutas. Ils emprims dus gols han ils Nordamericans numnadamain sajettà aifer las emprimas sis minutas. Suenter 42 minutas ha il Canada manà cun 5:0. Malgrà ch'ils Finlandais da Kalpa èn stads sut squitsch, n'han els betg laschà pender las alas ed han mussà in veritabel spurt final.
Era Frölunda en il mezfinal
Il suentermezdi è Ambri fruntà sin Frölunda da la Svezia. L'emprim terz è anc stà gulivà ed è ì a fin 0:0. Ma en il segund terz han ils Svedais dominà ils Tessinais e pudì far dus gols. Ed en l'ultim terz han els gist anc cementà la terrada per Ambri e festivà trais ulteriurs gols. Vers la fin ha Ambri mussà spiert da cumbat ed empruvà tut per anc realisar in gol d'onur, ma il puck n'ha betg vulì sa tschentar en il gol da Frölunda. Stan final: 5:0.
En il mezfinal da sonda suentermezdi fruntan ils Svedais sin il HCD.
