Avant in onn era Janis Baumann gia vegnì vicecampiun d'Europa ed uschia gudagnà sia emprima medaglia singula ad in eveniment grond. Al campiunadi mundial il 2019 en il Canada avevi dà cun l'equipa svizra la medaglia dad aur en la cursa da staffetta, il Team Relay.
A Leogang han sper Janis Baumann anc ulteriurs juniors svizzers persvadì a quest punct culminant da la stagiun. Sin ils plazs 6 fin 8 èn numnadamain classads Dario Lillo, Luke Wiedmann e Finn Treudler.
Discletg per Elisa Alvarez
Tar las junioras sut 19 onns ha la Grischuna Elisa Alvarez stuì sa cuntentar cun il 25avel plaz. La giuvna da Samedan è dentant vegnida franada d'in defect. En la segunda runda ha ella rut la chadaina e n'ha silsuenter gì nagina schanza pli da cumbatter per ina medaglia. Avant quest defect era Alvarez sin il terz plaz. La finala ha l'Engiadinaisa pers radund in quart ura sin la victura austriaca, Mona Mitterwallner. Meglra svizra è vegnida Annika Liehner sco 14avla.