Delia Durrer ha gudagnà la medaglia d'aur en la cursa rapida dal campiunadi svizzer a San Murezzan. La giuvna da 19 onns ha cun quai gia gudagnà ses quart titel en il campiunadi svizzer da ski alpin. L'onn passà ha ella triumfà en la cursa rapida, il super-G e la cumbinaziun. Plaz dus è ì a Jasmina Sutter e plaz trais a Noémie Kolly che ha gudagnà la mesemna la cumbinaziun.
En la cumbinaziun dals umens ha Luca Aerni gudagnà il titel. El era daventà il 2017 a San Murezzan campiun mundial. Sin plazza dus e trais èn sa classads Matthias Iten e Noel von Grünigen.
