Da preschent è il campiunadi svizzer da skis a San Murezzan. Nua che la gronda famiglia da skis sa raduna e sa mesira l'ultima giada en las diversas disciplinas e cumbatta per ils titels naziunals. Fadri Janutin vul surtut anc ina giada dar gas en sias disciplinas da parada, slalom e slalom gigant – ed empruvar da tegnair pitg als megliers da Swiss-Ski sco Marco Odermatt, Loïc Meillard u Gino Caviezel. Cun quels parta il talent grischun proxima stagiun en ils slaloms gigants da la cuppa mundiala. Quest plaz fix è la pajaglia per ses buns resultats en la cuppa europeica. Quella terminescha el en il classament general sco segund meglier. Segund plaz era en la disciplina slalom gigant, tge che munta quest plaz fix en la cuppa mundiala da skis. En la disciplina slalom terminescha el la stagiun en la cuppa europeica sco quart e manchenta mo per 12 puncts era là in plaz fix en la cuppa mundiala.
Debut gist cun ils emprims puncts en la cuppa mundiala
Mai ad emblidar vegn Fadri Janutin il slalom da la fin favrer a Garmisch. Igl è stà si'emprima cursa en la cuppa mundiala ch'el terminescha sco 17avel, gudogna gist a sia premiera ils emprims puncts ed è suenter in debachel da tut tschels atlets da Swiss-Ski a la fin il sulet Svizzer rangà.
Pulitas emoziuns era a la fin da la stagiun al final da la cuppa mundiala en Frantscha – nua che Swiss-Ski ha laschà partir a l'event da team in quartet da giuvens talents. E quels han fatg furora e gudagnà. En il final han els battì ils campiuns olimpics da l'Austria. Per Fadri Janutin in mument enorm da pudair parter quest success, surtut era cun ses bun cumpogn Livio Simonet.
Il pli fitg ma legrel sin Adelboden.
Era sche la stagiun da skis è stada lunga ed intensiva e tut ils atlets sa legran sin in pau vacanzas, po Fadri Janutin strusch spetgar sin che la nova stagiun da la cuppa mundiala cumenza. Tradiziunalmain l'atun en l'Austria cun ils slaloms gigants a Sölden ed el ch'è l'emprima giada a la partenza. Il pli fitg sa legra il giuven da 22 onns – ch'è creschì si a Landquart, che ha sias ragischs a Beiva/Marmorera e che ha fatg la scola da talents en Surselva – sin las cursas ad Adelboden. Per ils spezialists en las disciplinas tecnicas il pli grond classicher.
