Bler da rir han ils organisaturs da las cursas da la cuppa mundiala da skis a San Murezzan gì ils ultims dis. Aura stupenta en Engiadin'Ota ha procurà per cursas spectacularas cun ina icona dal sport da skis sin il podest. Cun premieras sin il podest e cun skiunzas svizras che han persvadì e pudì festivar in comeback gartegià.
Sch'i na fiss betg stà la gievgia il grev accident da Michelle Gisin duran il trenament per la cursa aval a San Murezzan, alura fiss la fin d’emna stada perfetga.
Nov concept è sa cumprovà
Spectacul sin pista, e dapli action era sper la pista Corviglia. Cun quel concept vulan ils organisaturs da las cursas da la cuppa mundiala da skis a San Murezzan ir en il futur. Sin pista na duain betg mo las meglras skiunzas dal mond procurar per spectacul, dentant duessan ellas er attrair in public interessà per las occurrenzas che capitan sper las pistas. Uschia han ins mess en pe in nov concept cun arranschaments enturn il sport da skis. Per il public duai quai dar en futur anc dapli acziuns.
Proximas occurrenzas, cuppa europeica e para cuppa mundiala
Las cursas a San Murezzan han ina gronda tradiziun ed èn fitg enragischadas en l’entira vallada. La hotellaria, la gastronomia, dentant er ils furners u las floristas s'identifitgeschan cun l’eveniment. E quai è tenor ils organisaturs il pli grond regal per lur grond engaschament per questas cursas.
Uschia fa i senn da duvrar l’infrastructura ch’è gia installada era per autras occurrenzas sco per exempel cursas da la cuppa europeica, u cursas da la para cuppa mundiala. Quai èn alura ils proxims eveniments sin la pista da la Corviglia.
