Gia per l'otgavla giada va Sandro Simonet da Casti a la partenza dal slalom da la cuppa mundiala ad Adelboden. A la fin vul el reussir er ina giada tar il classicher. Fin uss n'è el anc mai stà bun da sa qualifitgar per il segund percurs – quai cun excepziun dal 2022, cura che Sandro Simonet era da la partida en la segunda cursa. Alura è el dentant dà or e n'è betg stà bun dad ir per puncts ad Adelboden.
Il frar giuven Livio Simonet ha mussà co far
Gia la sonda tar il slalom gigant era il frar giuven da Sandro, Livio Simonet a la partenza dal slalom gigant. Livio Simonet ha mussà ina buna cursa e terminà quella sin plazza 22. Uschia ha el fatg gia tar sia segunda participaziun al slalom gigant dad Adelboden ils emprims puncts. Quai vul uss er realisar Sandro Simonet en il slalom. La preparaziun sin questa cursa era fitg buna. Simonet sa senta bain e vul attatgar sin la costa dal «Chuenisbärgli». El parta cun il numer 41. Simonet è in dad otg curridurs svizzers che van a la partenza dal slalom ad Adelboden.