Per Belinda Bencic è l’Australian Open a Melbourne a fin suenter la segunda runda. La Svizra ha pers cunter l'Americana Amanda Anisimova en dus sets cun 2:6 e 5:7.
Bencic ha gì problems dal dies durant la partida, vitiers ha er buffà in vent burascus e l’adversaria è sa preschentada en buna furma. Bain ha la Svizra cumenzà optimal cun in break e cun gudagnar ils emprims sis puncts. Silsuenter ha ses service dentant strusch funcziunà, cun dus ass e sis sbagls dubels.
Er en il segund set è Bencic ida cun in break 3:2 en avantatg. Suenter ch’ella ha pers ils dus suandants games, ha ella laschà vegnir la fisioterapeuta. La Svizra n’ha betg dà si la speranza e la partida, il destin n’ha ella dentant betg pli pudì midar.
Teichmann senza schanza
En la segunda runda è l’Australian Open era a fin per Jil Teichmann. Cunter la Belarussa Viktoria Azarenka n’ha ella nagina schanza – e perda cun 1:6 e 2:6.
Jil Teichmann n'è mai propi vegnida en la partida, cunter la dubla victura da l'Australian Open ed anteriura numer 1 dal mund. Ella ha gudagnà en ils emprims dus games sulettamain dus puncts, ed è gist stada en retard cun in break. E conquistar il service da Viktoria Azarenka n'è era betg gartegià, malgrà tschintg schanzas per far in break.
