Dapi il 2016 organisescha Swiss Olimpic la «Week of the Referee» – in'emna per onurar la lavur d'arbiters ed arbitras en il mund da sport. Quest onn èn 10 federaziuns da sport sa partizipadas a l'emna d'acziun – tranter auter la federaziun da ballape, Swiss Badminton, Swiss Hockey u era Swiss Unihockey.
Durant l'emna d'acziun, che vegn manada tras dal program da prevenziun da Swiss Olimpic «cool and clean», duain ils nunpartischants star en il center. I va per engraziar ad els ed ellas per lur lavur e per mussar stima. L'emna duai dentant era signalisar l'impurtanta da lur lavur, che n'è betg adina uschè simpla. A chaschun dal giubileum da 10 onns è il motto da quest onn perquai «engraziament».
Passiunà dapi 20 onns
Sch'ins patratga vi d'in arbiter vegn als blers probabel endament in arbiter u in'arbitra en in sport d'equipa. Ma er en auters sports èn els ed ellas indispensabels. Jon Fadri Carpanetti da Sent è gia dapi 20 onns arbiter en il sport da lutga. Pli bauld era el sez lutgader activ ed ha gia da lez temp entschiet a far arbiter. El fa quai ord passiun per il sport, ma era per dar enavos insatge al sport ch'ha medemamain dà bler ad el.
Sco arbiter rutinà ha Jon Fadri Carpanetti era fatg tras il svilup d'esser arbiter en il sport da lutga. Ils davos onns saja il squitsch, tenor el, creschì – tranter auter era, perquai ch'il sport da lutga è adina pli preschent en las medias. Uschia dettia dapli reacziuns sin las decisiuns dals nunpartischants. El sez n'haja anc betg gì in tal cas. Tranter ils lutgaders na dettia betg bleras discussiuns davart las decisiuns – e sche, lura possian ins adina sclerir quellas senza problems.
Bun set giadas ad onn saja Jon Fadri Carpanetti da la partida a festas da lutga. En la regiun dal nordost saja el gia stà a diversas festas chantunalas sco arbiter.