La sonda porscha bunas premissas per sa preparar sin il Maraton da skis engiadinais. Sco Gaudenz Flury da SRF meteo ha explitgà envers RTR, è la temperatura maximala en la regiun levamain sur 0 grad. Ed il vent buffia da la val giu, en direcziun S-chanf.
Naginas capriolas da l’aura
En il decurs da la notg sin dumengia cumenzi a naiver nà dal sid. Tranter 5 e 10 centimeters naiv nova spetga Gaudenz Flury, la differenza saja dentant gronda tranter Malögia, Silvaplauna e S-chanf.
Durant il maraton cuntinueschia probablamain da naiver, ed i dependia quant ditg ch’il singul curridur u curridura saja sin viadi. Ils svelts hajan forsa 1 centimeter naiv nova, ils pli plauns tranter 5 u perfin 10 centimeters.
Il vent buffa la dumengia en la dretga direcziun, pia en il dies. Quai valia dentant mo cura ch’ins saja vi da currer da la val giu, en direcziun da l’arrivada a S-chanf, manegia Gaudenz Flury da SRF meteo. Tar las rundas supplementaras buffia il vent gea magari da davant.
Las temperaturas duessan pli u main restar constantas la dumengia dal maraton. Per il territori da partenza lev sut 0 grad, il suentermezdi lura circa 2 grads a l’arrivada dal maraton a S-chanf.
