Preschentà vegn als sportists ed a las sportistas ils novs trends en il sport dal passlung, cusseglià ed infurmà. Savens cumbineschan ils participants e las participantas da la gronda cursa da passlung populara il viadi dad ir per lur numer da partenza en il center da congress Rondo, cun ina spassegiada tras l'uschenumnà «Marathon Village».
Atmosfera famigliara
Da sentir è d'ina vart la gnervusitad en vista a la partenza la dumengia a Silvaplauna, dentant er il plaschair d'esser puspè en il modus da «maraton», cun absolver il traject enfin a S-chanf en in bun temp persunal. Uschia il tenor ch'è d'udir sin via. Dus dis avant la cursa vegn anc discutà e barattà cussegls a reguard vestgadira, nutriment e tacticas. La dumengia a la partenza vegn quai a sa midar per blers, lura cumbatta mintgin e mintgina per sasez.
«Mes numer da partenza»
Grond travasch regna surtut en il center da congress Rondo a Puntraschigna, nua ch'ils numers da partenza vegnan distribuids. Savens dettia dumondas da curridurs e curriduras a reguard uraris da partenza ubain colliaziuns dal traffic public. La gronda part haja era chapientscha per la decisiun da l'organisaziun da partir davent da Silvaplauna, ha manegià ina da las voluntarias che lavura en la sala dal Rondo.
Passa 1'000 voluntaris èn en acziun avant e durant il Maraton da skis engiadinais. Avant la cursa ha mintga participant e participanta da passar en il center da congress Rondo a Puntraschigna per ses numer da partenza. Andrea Picenoni da Champfèr è in dals numerus voluntaris che lavura tar la distribuziun da quellas passa 13'000 bustas. Per el ina lavur ch’il stat a cor, cun quai ch’el sa senta collià cun la cursa dapi sia unfanza.
