Gia davent da l’entschatta è sa distatgada ina gruppa. Circa 10 curriduras èn idas a la testa ed han fatg enorm tempo. La gruppa è alura vegnida adina pli pitschna. Sin ils davos dus, trais kilometers eran be pli Giuliana Werro da Zernez e Seraina Boner da Claustra a la testa. Sin ils davos kilometers ha l’engiadinaisa Giuliana Werro fatg anc in zichel dapli tempo.
Ella è stada buna da currer davent ed è vegnida persula a l’arrivada a S-chanf. Cun in temp da 36 minutas e 39 secundas ha ella realisà in nov record da traject. Anc mai na è ina dunna currida ils 17 kilometers da Samedan a S-chanf uschè spert sco Giuliana Werro. Ella ha pia gudagnà l’ediziun da giubileum da la cursa da las dunnas avant Seraina Boner. Terza è vegnida Helena Guntern da Ftan.
Cun radund 1’300 participantas – il segund meglier resultat insumma – fa il schef dal Maraton da skis engiadinais, Menduri Kasper, bilantscha positiva da la 25avla ediziun da la cursa da las dunnas da Samedan a S-chanf.
Avant la cursa: temperaturas da primavaira fan quitads
Per la cursa da dunnas na duain las temperaturas autas dentant betg esser uschè in grond problem. Il traject maina be sur 17 kilometers da Samedan a S-chanf. E durant las notgs èn las temperaturas pulit bassas. Era che la cursa da dunnas na passa betg sur ils lais da l’Engiadin'Ota è d’avantatg. L’onn 2000 e stada l’emprima ediziun.
Dar dapli spazi a las dunnas era la finamira avant 25 onns
Emil Tall, iniziant da questa cursa ed anteriur president dal «Engadin Skimarathon», sa regorda co che tut ha cumenzà. L’onn 1999 ha Tall surpiglià la direcziun dal «Engadin Skimarathon». Durant sias analisas haja l’organisaziun constatà che be 10% dals radund 13'000 participants da la pli gronda cursa populara da passlung en Svizra, eran dunnas.
Bleras dunnas avevan tema da la gronda massa u da la distanza da 42 kilometers. Plinavant era quai savens il cas che las dunnas stevan a chasa cun ils uffants, entant che lur umens prendevan part al Maraton da skis engiadinais.
Perquai è naschida l’idea da crear ina cursa pli curta, cun 17 kilometers, in’emna avant il grond maraton da skis. Quai surtut per pussibilitar a las dunnas in pass pli simpel en il sport da passlung. Gia l'emprima ediziun da la cursa ha surpassà tut las aspectativas cun 728 participantas.
La cursa da dunnas è vegnida concepida sco eveniment da sport popular, cun il focus sin il plaschair e betg sin la cumpetiziun. Era grazia a la cursa da dunnas è il dumber da dunnas che prenda part al Maraton da skis engiadinais s’augmentà considerablamain.
Ozendi cumpiglia la gronda cursa populara da Malögia a S-chanf passa 22% participantas, e tar il mez maraton da Malögia fin a Puntraschigna è questa cumpart perfin 44,5%.
Per l’ediziun da giubileum da 25 onns cursa da dunnas, il prim da mars 2026, èn s'annunziadas entant passa 1'200 dunnas.