La Festa federala da tir vegn organisada mo mintga tschintg onns e vala sco grond eveniment sportiv. Ella unescha la concurrenza sportiva, isanzas vividas ed uniun federalistica. La 59avla ediziun da la Festa federala da tir 2026 stat sut il motto «tradiziun e passiun». Spetgads vegnan 36'000 tiraduras e tiradurs e 100'000 aspectaturas ed aspectaturs.
Suenter 40 onns ha la festa federala da tir puspe lieu a Cuira – e las preparativas per quai grond eveniment sajan stadas intensivas, di il president dal comité d'organisaziun Martin Candinas. «Ussa, suenter 5 onns preparaziun, vulain nus finalmain schar liber», di el.
Nus avain uschè blera glieud che dat uschè bler cor en quest project ch'i sto simplamain reussir e daventar, sco il tudestg di, in 'Volltreffer'!
Tuttina dettia quai anc difficultads, manegia el, per exempel da chattar avunda voluntaris. Da las circa 5'000 ch'i dovra per la festa federala mancan uss, trais emnas avant, anc bunamain 150. «Chattar avunda voluntaris è fitg difficil. En las regiuns ruralas èsi dentant pli simpel ch'en la citad a Cuira.»
El saja dentant persvadì, ch'anc dapli glieud s'annunzia, pli datiers che la festa federala da tir vegnia. Quella festa na dovra dentant betg mo bler lavur voluntaria, mabain èra in concept da segirtad. Var 35'000 tiraduras e tiradurs vegnan spetgads a la festa federala, tuts cun atgnas armas. Quellas ston vegnir controlladas e registradas, e quellas na dastgan betg simplamain vegnir laschadas per terra. Tuttina sa legra Martin Candinas – «quai sa mo vegnir bain!»
Decentral e modern
Il lieu principal e center da la festa è il Rossboden a Cuira. Ultra da quai vegnan organisadas las concurrenzas sin 19 plazzas da tir externas en l'entir chantun, tuttas cuntanschiblas entaifer maximalmain 45 minutas temp da viadi.
Per la citad da Cuira ed il chantun Grischun è la Festa federala da tir 2026 ina gronda occurrenza cun gronda attracziun. Durant pliras emnas porta l’eveniment blers visitaders en la regiun e procura per in impuls economic, surtut per l'hotellaria, la gastronomia ed il commerzi. Grazia a la realisaziun decentrala sin 19 implants da tir profiteschan er autras regiuns grischunas.
Per l'emprima giada vegn il tir da 300 meters fatg cumplettamain en furma digitala e senza avisaders. Ils resultats vegnan registrads e transmess directamain sin via electronica. Ils organisaturs fan uschia quint cun dapli effizienza, dapli segirezza ed ina meglra transparenza per il public e per las participantas ed ils participants.
Sajettà vegn cun schluppet (300m, 50m, 10m) e cun pistola (50m, 25m, 10m), inclusiv las categorias pusar, juniors e veterans. En tut stattan sin il program passa 140 differentas serias (Stiche) e 16 campiunadis.
Organisaziun
Responsabla per la realisaziun è l'uniun Festa federala da tir 2026 Cuira, manada dal president dal comité d'organisaziun Martin Candinas en collavuraziun cun la Federaziun svizra dal sport da tir.
La festa munta ina gronda sfida organisatorica per citad, chantun e vischnancas, ch’è dentant pussaivla grazia a la lavur da radund 5’000 voluntarias e voluntaris che vegnan a prestar durant la festa en tut circa 150'000 uras da lavur.